कवयित्री सुशीला त्रिविक्रम भट : एक उगडास

भांगरभूंय | प्रतिनिधी

भाशेच्या अस्तित्वा खातीर झुजल्लेली एक महान व्यक्तीत्व आसा, सुशीला त्रिविक्रम भट ही कवयित्री. केरळचे जावो ना जाल्यार कर्नाटक वा गोंयचे, एक तरान सगळे कोंकणी संस्थोय जावनु निरंतर सम्पर्क आसून दिसा २४ घंटे अनि वर्सा ३६५ दीसय कोंकणी आनी इतर समाजीक प्रवर्तनान्तु सेवा तात्पर्य दकोवनु आयिल्ली सुशीला भट आमकां सोडून वचून डिसेंबर ३ तारिखेक एक वर्ष जाता.

कोंकण्यांगेले आचार, विचार, गीत, लोकगीत हाचे पासून कोणाकय, ते केरळांतुले जावो भायरचे जावो जनांक कसलीय तरी जाणवीकाय जाय जाल्यार ते पयलींच सोदतालीं. कोच्चींतुली सगटांक परिचित आशिल्ली सुशीलक्का, सुशीला भट्टिणायी अशीं नांवार ओळखुपी सुशीला टी. भट्ट हांकां. मात्र न्हय, कोंकणी बरोवप्या पासून, जाय जाल्यार कोंकणी जनांली वंशावली भित्तेरी सांगून मनांत करनु दिवंचाक आशिल्लें तिगेले ते जाणविकाय सम्पन्न भाषेकच एक मूलधन आशिल्ले.
कोंकणी हरिकथा रंगांतु पयलीची महिला ती आशिल्ली. कोंकणीचे कला, साहित्य, संस्कार, खाण, पालन- पोषण, प्रचार अशी सकळें विभागांतूय तिगेले जावनु तन- मन- धन सहकरण आनि प्रोत्साहन ती दित्ताली. समाज सेवा रंगांतूय तिगेले प्रवर्तन विसरूक जायना. साहित्य अकादेमी पुरस्कार पर्यंत मेळूक योग्यताय आशिल्ली जाल्यारीयी, मान- सम्मान, पुरस्कार इत्यादिचेर काय मोहु नात्तिलें ती, तिगेले प्रवर्तन ‘कर्मण्येवाधिकारस्ते..’ म्हळेल्यावरी मोगान करताली. देहास्वास्थ्य लेकांत काडूनत्तिलें आखेर पर्यंत हासचे मुखान, संतोषान सजीव प्रवर्तनांत कर्म निरत आशिल्ली त्या सुशीला बायेलो उगडासु सदा सगटांक आसतोलो.
कोंकणी भासे साहित्याचे कथा, कविता, लेखन, प्रबन्ध, नाटक, बाल साहित्य, लोकगीत, पाचक, हरिकथा इत्यादी अनेक शाखेंचेर सक्रिय साहित्य रचना करून येवंची लेखिका आसली ती. जल्यार सोळा – सत्तेरा वर्षांक थोडे पारिवारीक प्रतिकूल साहचर्यान तिका त्या रंगांत थाकून स्वल्प दूर राबका पङलें. जल्यारीय त्या वर्षांतूय अपूर्व जावनु पुणी ती साहित्य सृष्टी करून येत्ताली.
गोश्री कला- केन्द्र संस्थे खाला ‘अष्टपदी’, ‘रघुनाथ महापात्र’, ‘अन्यथा चिन्तितं कार्यं’, ‘सुक्ती अनीक भरती’ इत्यादी कोंकणी नाटकां, “सती सुकन्या”, “वोळारु”, “गणपतीलो लड्डु” इत्यादी नृत्य नाटिकां, “भक्त विठळ दास”, “मनकोजी बोधला”, “साधु शंकर दास” इत्यादी कोंकणी हरिकथा अवतरण करून कलारंगांतूय आनी ‘अज्जेलीं वोक्कदां’,‘साळग्राम’ (काणीयां संग्रह), ‘कोंकणी पाचक सहायि’ (मलयाळम – २ आवृत्ती), ‘कोंकणी पाचक पञ्चकं’ (मलयाळम – ५ पुस्तकां) अशी पुस्तकां बरवूनूय, ‘एदेच कोंकणीलोकगीत’ पुस्तकाचें संपादन करून साहित्य रांगान्तूय बाय सुशीला भट हीणे योगदान दिल्लें आसा.
प्रमुख कोंकणी संस्थेत तिका अंगत्व आसून घेवनु कोंकणी रंगान्तु पुनः प्रवेश घेताना कोंकणी केन्द्र – गोश्रीपुर संस्थेचे उपाध्यक्ष पदार आसून तिणे म्हस्त काम केलें. प्रतिवर्षं ‘कोंकणी सप्ताह’, प्रतिमास कोंकणी कवी संगमं (४२ म्हन्यो), संस्थचे वाटेन १५ पुस्तकां छापूक सगट तिगेली प्रबल इच्छाशक्ति आसली आनी प्रचोदन, निरीक्षण बी आसलें.
गेले वरसा तिजे निधन हेतु कोंकणी मळार एक चलित ग्रन्थशाला ना जाली. कोंकणी मळार तिगेलो जागो आतांय रितो पडला. तिचे पवित्र स्मरणांचे मुखार हांव नम्रपणान नमन करतां.
(लेख केरळ कोंकणी शैलींत आसा.)

एन. बालकृष्ण मल्ल्या
94972 01681