भांगरभूंय | प्रतिनिधी
पणजी: गोंय पुलिसांच्या गुन्यांव फांट्यान कळंगूटे एका हॉटेला भायर शिंदळकी वेवसाय प्रकरणांत धाड घालून डेव्हीड चेट्टियार (56, उसकय, बार्देस) ह्या दलालाक अटक केली. ह्या वेळार एके बायलेची सुटका करून तिका मेरशे बायल सुधार घरांत धाडून दिल्या.
गुन्यांव फांट्यान दिल्ले म्हायती प्रमाण कळंगूट वाठारांत राजू नांवाचो मनीस हेर वांगड्यांचे मजतीन शिंदळकी वेवसाय चलयत आशिल्ल्याची म्हायती गुप्तहेरांनी गुन्यांव फांट्याच्या एका अधिकाऱ्याक दिल्ली. ते प्रमाण गुन्यांव फांट्याचे अधिक्षक राहूल गुप्ता आनी उपअधिक्षक राजेश कुमार हांच्या मार्गदर्शना खाला हवालदार, स्नेहा झवेरी, अशोक गावडे, ईर्शाद वाटांगी, कॉन्स्टेबल महाबळेश्वर सावंत, रुपेश गायकवाड, क्रितेश किनाळकार, गृहरक्षक सुचिता घाडी आनी हेर कर्मचाऱ्यांच्या पंगडान बुधवारा 24 वेर मध्यान रातीं 11.05 ते बिरेस्तार 25 वेर 1.15 ह्या वेळांत मड्डोवाडो कळंगूटे हॉटेल डावनटावना भायर सांपळो रचलो.
ह्याच वेळार पंगडान बनावट गिरायका वरवीं राजू हाचे कडेन संपर्क सादून एके बायलेची मागणी केली. उपरांत थारिल्ले प्रमाण डेव्हीड चेट्टियार हो एके बायलेक घेवन थंय आयलो तेन्ना गुन्यांव फांट्यान ताब्यांत घेवन उपरांत ताका अटक केली. जाल्यार शिंदळकी वेवसाया खातीर हाडिल्ले बायलेची सुटका केली. सुटका केल्ले बायलेक मेरशे बायल सुधार घरांत धाडून दिल्या.
मजगतीं, ह्या प्रकरणांत पुलीस निरिक्षक विकास दयेकार हांणी भारतीय दंड संहितेच्या कलम 370, 370(1),(2) आनी मनीस तस्करी प्रतिबंधक कायद्याचें कलम 4, 5 आनी 7 खाला गुन्यांव दाखल केला. अटक केल्लो दलाल डेव्हीड चेट्टियार हाका पुलीस कोठी खातीर म्हापशेंच्या पयलो वर्ग न्यायालयांत हजर करतकूच न्यायालयान ताका चार दीस पुलीस कोठी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
