भांगरभूंय | प्रतिनिधी
म्हापशें : कळंगूटेच्यान एक धक्को दिवपी घडणूक आयज मुखार आयली. हांगाच्या एका हॉटेलांत कर्नाटकांतल्या दोगांनी आत्महत्त्या करपाचो यत्न केलो. हातूंत एकल्याक मरण आयलें. जाल्यार एक बायल जखमी जाल्या.
मेळिल्ले चड म्हायती प्रमाण, कळंगुटे पुलीस स्टेशनाचेर खोबरावाडो, कळंगूटेच्या हॉटेल बोनांझांतल्यान आत्महत्त्येची म्हायती दिवपी फोन आयलो. पुलिसांनी घडणुके सुवातेर वचून पळोवणी केली तेन्ना महेश सुंतनूरे (४५,बिदर- कर्नाटक) हांणी फॅनाक गोळ घेवन आत्महत्त्या केल्ल्याचें दिसलें. जाल्यार ताचे सयत आशिल्ली बायल सोनाली (२५, बिदर-कर्नाटक) हिचे मानेर घावो आसलो. गंभीर जखमी जाल्ले सोनाली हिका लागींच्या हॉस्पिटलांत उपचारा खातीर व्हेली.
मजगतीं, ह्या दोगांयनी १९ ऑक्टोबराक हॉटेलांत चेक ईन केल्लें. जाल्यार तांचो चेक आवट काल २० ऑक्टोबराक आशिल्लो. उपरांत त्या दोगांयनी एक दिसाचें रावप वाडयिल्लें.
पुलिसांच्या तपासा प्रमाण, सोनाली हिचें चार वर्सां पयलीं लग्न जाल्लें. जाल्यार महेश होय लग्न जाल्लो. ताका बायल आनी तीन भुरगीं आसात. हाका लागून ह्या प्रकरणाक लग्ना भायले संबंद कारण थारूं येतात, असो अदमास पुलिसांनी उक्तायला. हे विशीं पुलीस तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
