भांगरभूंय | प्रतिनिधी
म्हापशें, प्रतिनिधी ः कळंगूटे दर्यावेळेर दवरिल्ली पर्यटकांची बॅग चोरपाच्या प्रकरणांत पर्यटक पुलिसांनी कर्नाटकांतल्या तीन जाणांक धरुन फुडली कारवाय करपा खातीर कळंगूटे पुलिसांच्या ताब्यात दिले. दुबावितां कडल्यान तीन मोबायल फोन जप्त केल्यात. दुबावीत मणी कांथा, कुमारीश आनी गुरूप्रसाद काळे (सगले रावपी कर्नाटक) हांकां पुलिसांनी प्रतिबंधात्मक कारवाय खाला ताब्यात घेवन अटक केल्या.
सोमारा सकाळीं 11:30 वरांचे सुमाराक ही घडणूक घडली. पंजाबचो पर्यटक बिपिन गुप्ता ताची घरकान्न आनी भुरग्या सयत कळंगूटे दर्यावेळेर आयल्लो. तांणी आपले दोन मोबायल फोन आनी कांय रोख रक्कम आशिल्ली हँडबॅग दर्यावेळेर दवरली आनी तें सगळे उदकांत देंवले. कांय काळा उपरांत ते बॅग दवरिल्ल्या सुवातीर पावले जाल्यार बॅग गायब आशिल्ली. उपरांत तांणी बॅग चोरयेक गेल्ल्याची म्हायती लागसारच्या पर्यटक पुलिसांक दिली.
पुलीस हवालदार चेंद्रू नेग्लूर आनी सर्वेश मांद्रेकार हांकां वयले तीगूय दुबावित दर्यावेळेर वावुरतना सांपडले. पुलिसांनी तांकां धरून पर्यटक पुलीस स्टेशनांत व्हेले. थंयच्या पुलिसांनी केल्ल्या तपासणेंत दुबावितां कडेन वट्ट तीन मोबायल फोन सांपडले. तातूंतले दोन मोबायल फोन बिपिन गुप्ताचे आशिल्ले. पूण बॅगेत आशिल्ली रक्कम पुलिसांक मेळूंक ना.
पर्यटक पुलीस खात्याचे निरिक्षक जतीन पोतदार हांणी वयल्या तीनूय दुबावितांक कळंगूटे पुलिसांच्या ताब्यांत दिले. कागाळदार कागाळ करपाक तयार नाशिल्ल्यान पुलिसांनी प्रतिबंधात्मक कायद्याच्या कलम 41 सीआरपीसी खाला दुबावितांचेर गुन्यांव दाखल करून तांकां अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
