भांगरभूंय | प्रतिनिधी
म्हापशें: बागा कळंगूटे पार्कींग थळार पार्क केल्ली मोटार फोडून पुणें पर्यटकांच्या मोबायल चोरी प्रकरणांत कळंगूट पुलिसांनी चार दुबावीत चोरांक अटक केली आनी चार फोन जप्त केले.
अटक केल्ल्या दुबावितां मदीं सुरेश राठोड, तरुण राठोड, विठ्ठल राठोड आनी विक्रम राठोड (सगले रा. कळंगूट, मूळ गदग-कर्नाटक) हांचो आस्पाव आसा.
ही घडणूक फाटल्या जून म्हयन्यांत घडिल्ली. पुणें हांगासरले कागाळदार नाटे गोंयांत कळंगूटे आयिल्ले. तांणी आपली मोटार बागा पार्कींग थळार पार्क केल्ली. अनवळखी चोरांनी तांचे मोटारींतल्यान दोन मोबायल फोन चोरून व्हेल्ले.
ह्या मोबायल चोरी प्रकरणाच्या तपासा उपरांत पुलिसांनी बुधवारा रातीं वयल्या दुबावितांक अटक केली आनी तांचे कडल्यान कागाळदारांचे दोना सयत चार आयफोन मोबायल जप्त केले. हेर दोन मोबायल धनयांचो सोद पुलीस घेतात. फुडलो तपास पुलीस निरिक्षक दत्तगुरू सावंत हांच्या मार्गदर्शना खाला हवालदार सतीश सावंत करतात.
मजगतीं, नायकवाडो कळंगूटे एड्रील पास्कॉल कुएलो (मयडें) हांची जीए 03 डब्ल्यू 3664 ही मोटार अनवळखी चोरांनी चोरून व्हेली. ही मोटार राहुरी महाराष्ट्र पुलिसांचे मजतीन कळंगूट पुलिसांनी राहुरी हांगा धरली आनी चोरा सयत ताब्यांत घेतली. दुबावीत चोराक हाडपा खातीर पुलीस पंगड महाराष्ट्रांत गेला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.