भांगरभूंय | प्रतिनिधी
भांगरभूंय । प्रतिनिधी
म्हापशेंः उत्तर गोंय दर्या देगेर रावपी लोक, चड करून कळंगुटे, कांदोळी आनी हणजुणे- वागातोर दर्या देग वाठारांत रावपी लोकांक व्हडा आवाजान लायतात त्या म्युझिकाक लागून सामके त्रास जावपाक लागल्यात. ह्या आवाजा प्रदुशणाचेर नियंत्रण दवोरपा खातीर उपाय येवजण करपाचें उतर मुख्यमंत्री डॉ प्रमोद सावंत हांणी दिवंन लेगीत आयज मेरेन तें उणे जायना हे खातीर लोक सामके बेजारल्ले कडेन आसात.
रातयां 10 उपरांत व्हडा आवाजांत म्युझिक लावपाक कायद्यान बंदी केल्या तरीय पर्यटन वेवसायांत आशिल्लीं कांय वेवस्थापना सांजे 6 तें 10 वरां मजगतीं सर्वोच्च न्यायालयान घालून दिल्ल्या मर्यादे परस चड आवाजांत म्युझिक लायतात अश्यो लोकांच्यो कागाळी आसात. कांय रेस्टॉरन्टांनी आनी क्लबांनी म्युझिक कमी-चड करून फटोवपी डावपेच खेळटात. रातयां 10 उपरांत संगीत नियंत्रीत आवाजात आमी म्युझिक लायतात हें दाखोवन दिवपाचे तांचे यत्न आसतात.
पार्ट्यो आयोजीत करून व्हडा आवाजांत म्युझिक लायिल्ले खातीर कांय आस्थापनांचेर हाचे पयलीं कारवाय केल्ली तरीय तातूंतल्यान तांणी कसलीच शिकवण घेतली ना अशें दिसून येता. व्हडा आवाजांत म्युझिक लावपाच्या ह्या प्रकाराचो ज्येश्ठ नागरीक तशेंच अभ्यास करपी विद्यार्थ्यांचेर परिणाम जाता. आवाजा प्रदुशणाक लागून कांय क्लब आनी रेस्टारंन्टाचेर कारवाय केल्ल्यान कान पिड्ड्यार करपी म्युझिक लावपाचें मदीं बंद जाल्लें. मात कारवायेची भिरांत कमी जातगीर ताचो परत त्रास जावपाक लागता अशें हणजुणच्या रवी हरमलकार हाणे सांगलें. डायझ, रायथ, हाऊस ऑफ चापोरा आनी रोमिओ लेन ह्या आस्थापनांत म्युझिक लावपा संबंदी कसलेंच बंदन ना अशें म्हणचें पडटा अशें ताणे सांगलें. लोकसभा वेंचणुकेच्या आचार संहितेक लागून हालीं साराक व्हडा आवाजांत म्युझिक लावपाचे मात्शें उणे जालां अशी म्हायती ताणे दिली. पुलीस लेगीत आमच्या कागाळेची दखल घेवन म्युझिक बंद करपाक येतात अशें हणजुणे- वागातोर पट्ट्यांतल्या आवाजा प्रदुशणा आड आवाज काडपी डेसमंड डिकॉस्ता हाणे सांगलें.
बागा हांगच्या झेवियर रिट्रीट हावसांत रावपी लोकांक लागींच्या शॅक्स आनी वेपारी आस्थापनांतल्या येवपी संगीताच्या आवाजाक त्रास जाता अशें ज्युवीस मोनिझ हाणे सांगलें. सांजे 6 तें रातयां 10 मगजती व्हडा आवाजांत म्युझिक लायतात ताचो आवाज सोसपाक जायना अशें झेवियर रिट्रीट हावसाचो संचालक शॅनोन परेरान सांगलें. आमच्या रिट्रींतांत चडशे विदेशी पर्यटक रावपाक येतात. तांका शांतताय जाय आसता. मेलिडीक आवाजात संगीत लावपाक तांची हरकत आसना, आवाज वाडटगीर ते आमचे कडेन कागाळी करपाक लागता अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
