भांगरभूंय | प्रतिनिधी
शॅकाचो धनी, ताचो पूत आनी दोन कर्मचाऱ्यांक अटक
म्हापशें, प्रतिनिधी ः कळंगुटे दर्यादेगेवेल्या एका शॅकात पर्यटकांक मारपेट करपाची घडणूक घडली. हांतूत भोला रवी तेजा (28, आंध्र प्रदेश) ह्या पर्यटकाक मरण आयलें. ह्या खून प्रकरणांत मरीन शॅकाचो धनी आग्नेल सिल्वेरा (६४) हाचे सयत ताचो पूत शुबर्ट सिल्वेरा (२३), कर्मचारी अनिल बिस्ता (२४, मूळ नेपाळ) आनी कमल सुनार (२३, मूळ नेपाळ) हांकां अटक. ही खूनाची घडणूक मंगळारा मध्यानरातीं 1 ते 2 वरां मजगतीं घडली.
मेळिल्ले म्हायती प्रमाण, भोला रवी तेजा आनी ताचे इश्ट मेळून चार- पांच जाणांचो पंगड कळंगुटेंतल्या मरिन बीच शॅकांत जेवपाक गेल्ले. ह्या पर्यटकांक आनीक थोडें जेवण जाय आशिल्लें. पूण शॅकाच्या कर्मचाऱ्यांनी रांदची कूड बंद जाली, अशें सांगलें. हाका लागून पर्यटक पंगड आनी शॅकाच्या कर्मचाऱ्यां मदीं वाद जालो आनी हें प्रकरण मारपेटाचेर पावलें.
पुलिसांनी दिल्ले म्हायती प्रमाण, शॅकाचे कर्मचारी आनी धनी हांणी पर्यटकांक बडयेन मारपाक सुरवात केली. मेल्ल्या भोला रवी हाच्या तकलेर नेटान बडी बशिल्ल्यान तो गंभीर जखमी जालो. उपरांत सगल्या जखमींक कांदोळेच्या भलायकी केंद्रांत उपचारा खातीर व्हेले. तेन्ना भोला रवी हाका मरण आयिल्ल्याचें दोतोरांनी सांगलें.
घडणुकेची म्हायती मेळटाच कळंगूटे पुलीस निरिक्षक परेश नायक हांणी वांगड्या सयत घडणूक सुवातेर धांव घेतली आनी पंचनामो केलो. पुलीस उपअधीक्षक विश्वेश कर्पे आनी अधीक्षक अक्षत कौशल हांणी घडणूक सुवातेक भेट दिवन पळोवणी केली.
पुलिसांनी खूनाच्या आरोपा खाला गुन्यांव नोंद केला. फुडलो तपास करतात.
पुलिसांच्या सुचोवण्यां कडेन दुर्लक्ष…
पर्यटकांक कोणेंच हात लावचो न्हय वा तांकां मारचे न्हय, पर्यटक मस्ती करता जाल्यार तांकां समजोवपाचो यत्न करचो आनी रोखडेच पुलिसांक आपोवचे. अशीं सुचोवणी खुबश्या वेळार पुलिसांनी शॅक, रेस्टॉरंट आनी हॉटेलकारांक दिल्या. पूण तरी लेगीत दर्यादेगेवेल्या वाठारांनी पर्यटकांक मारपेट करपाचे प्रकार घडटात. ह्या खूनांतल्यानूय तेंच स्पश्ट जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
