भांगरभूंय | प्रतिनिधी
पणजी : कळंगुटे मनशांच्या तस्करी (ह्युमन ट्रॅफिकिंग) रॅकेटाक उक्तडार हाडपाक गोंय पुलिसांच्या क्रायम ब्रांचाक व्हड येस आयालां. २ जुलयाक सकाळीं गुपीतपणान आनी नियोजनबद्ध पद्धतीन घातिल्ल्या छाप्यांत एके पिडेस्त बायलेची सुटका केली. मूळ तेलंगाच्या एका मुखेल दुबाविताक धरलो.
क्रायम ब्रँाचचे पुलीस अधीक्षक जिवबा दळवी हांच्या सरळ देखरेखी खाला ही विशेश मोहीम राबयली. पुलिसांक कळंगुटेच्या ’पामीर्ना रिसॉर्ट’ वाठारांत एक बायले शिंदळकी वेवसाया खातीर हाडटले अशी खात्रीची आनी गुपीत म्हायती मेळिल्ली. हे म्हायतीच्या आदारार पुलिसांच्या पंगडान सांपळो रचलो. सकाळीं दोन ते चार वरां मजगतीं दुबावीत पुन्ना हरी प्रसाद (३३, मूळ रा. यादाद्री भुवनगिरी, तेलंगणा, सध्या रा. हडफडें-गोंय) हो काळ्या रंगाचे फॅसिनो स्कुटरीवेल्यान थंय पावलो. तो गिरायकां कडेन सौदा करून पिडेस्त बायलेक तांचे सुवादीन करपाचो आसतना दोळो दवरून आशिल्ल्या क्रायम ब्रांचच्या पंगडान ताका धरलो.
पुलिसांनी घडणुके सुवातेवेल्यान पिडेस्त बायलेची सुटका केली. तिका सद्या कायदेशीर संरक्षणांत दवरल्या. ह्या प्रकरणांत पुलीस निरीक्षक विकास देयकार हांणी दिल्ले कागाळी आदारार गुन्यांवाची नोंद केली. दुबाविता आड भारतीय न्याय संहिता (BNS), २०२३ च्या कलम १४३, १४३(१), १४३(२) आनी अनैतीक वेपार प्रतिबंधक कायदो (ITPA), १९५६ च्या कलम ४, ५ आनी ७ खाला गुन्यांव दाखल करून ताका अटक केल्या.
हे कारवायेंत पुलीस निरीक्षक विकास देयकार, तुषार लोटलीकार, महेश गडेकार, एएसआय अशोक गावडे आनी पुलीस कॉन्स्टेबल विशाल नायक, कल्पेश तोरस्कार, रोशनी शिरोडकार, सेजल दळवी तशेंच ’अर्ज’ ह्या सेवाभावी संस्थेच्यो स्नेहा चारी हांणी म्हत्वाची भुमिका केली. ह्या प्रकरणाचो फुडलो तपास पुलीस करतात. ह्या रॅकेटाचें कनॅक्शन आंतरराज्य पातळेर पातळ्ळा. हाचो सोद घेतात अशें पुलिसांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
