भांगरभूंय | प्रतिनिधी
कोंकणी नाट्यसर्त सुवाळ्यांत पुंडलीक नायक हांकां जीणेगौरव भोवमान
भांगरभूंय । प्रतिनिधी
पणजी : कला आनी संस्कृतीक लागून समाज समृद्ध जाता. कोंकणी नाट्यसर्त ही फक्त काणी न्हय जाल्यार कोंकणी संस्कृताय आनी नाटकाचे परंपरेचें भांगराळे दायज आसा, अशें केंद्रीय ऊर्जा राज्यमंत्री श्रीपाद नायक हांणी म्हणलें.
कला अकादमीचे कोंकणी नाट्य सर्तीच्या भांगरा उत्सवी सुवाळ्याक मुखेल सोयरे ह्या नात्यान मंत्री नायक उलयताले. कार्यावळींत कोंकणी नाट्य क्षेत्रांत मोलादीक योगदान दिवपी पुंडलीक नायक हांकां जीणेगौरव पुरस्कार भेटयलो. कला आनी संस्कृती खात्याचे मंत्री रमेश तवडकार, कला अकादमीचे अध्यक्ष चंद्रकांत कवळेंकार, उपाध्यक्ष डॉ. प्रवीण गांवकार, कोंकणी अकादेमीचे अध्यक्ष डॉ. पूर्णानंद च्यारी, वांगडी सचीव शंकर गांवकार आनी हेर मानेस्त कार्यावळीक हाजीर आशिल्ले. कार्यावळी पयलीं ‘समकालीन भारतीय रंगमाचयेर कोंकणी नाटक’ ह्या विशयाचेर परिसंवाद जालो.
कोंकणी नाट्य लेखक आनी साहित्यीक पुंडलीक नायक हांचो जीणेगौरव पुरस्कार भेटोवन भोवमान जालो. शाल, पुस्तक, मानपत्र आनी रोख एक लाख रूपया अशें ह्या पुरस्काराचें स्वरूप आसा. ह्या वेळार तांची घरकान्न हेमा नायक हांचोय भोवमान जालो.
गोंय ही भोगभूंय आसा, ही गोंयची वळख पुसून उडोवपाची गरज आसा, अशें कला आनी संस्कृती खात्याचे मंत्री रमेश तवडकार हांणी सांगलें. समाजांत 20 टक्के लोक हे सर्जनशील आनी संवेदनशील आसात. संस्कृताय तिगोन दवरपाची जापसालदारकी ह्या 20 टक्के लोकांची आसता. ज्या मनशाक वा गांवाक वा राज्याक संस्कृती आसना, ताचो अंत हो अटळ आसा, अशें तवडकार हांणी सांगलें. ह्या वेळार पुंडलीक नायक हांच्या जीविताचेर आदारीत चित्रफितीचें प्रसारण जालें.
कोंकणी मनीस हो विंगड, विंगड वाठारांनी शिंपडिल्लो आसलो तरी ताणें कला, साहित्य, संस्कृती सांबाळून दवरल्या, अशें कोकणी अकादेमीचे अध्यक्ष डॉ. पूर्णानंद च्यारी हांणी सांगलें. कोंकणी नाट्य सर्तींत सुरवेक 5 नाटकां सादर जाय नाशिल्लीं, आतां मात आंकडो वाडत आसा, अशें तांणी सांगलें.
नाट्य सर्तींतल्या जैतिवंतांक ह्या वेळार मानेस्तां हस्तुकीं इनामां दिलीं. कोंकणी नाटकांत योगदान दिवपी कलाकारांचोय भोवमान जालो. हातूंत दिग्दर्शक प्रमोद महाडेश्वर, निलेश महाले, सुशांत नायक, नाटककार डॉ. प्रकाश वजरीकार, डॉ. जयंती नायक, मुकेश थळी, झीलू गांवकार, वसंत भगवंत सावंत, दीपराज सातार्डेकार, डॉ. राजय पवार, अभिनय मयुर मयेंकार, तुळशीदास धोणशीकार, व्यंकटेश गावणेंकार, प्रशांत सतरकार, शेखर उसगांवकार, सुकांती हिरू नायक, माधुरी शेटकार, गौरी कामत, मनुजा शेट नार्वेकार लोकूर, खुशबू कवळेंकार, उजवाड येवजण सिद्धार्थ हळर्णकार, विकास चोपडेंकार, पार्श्वसंगीत सचिन चौगुले, दिलीप वझे, रंगभुशा प्रेमानंद पोळे आनी एकनाथ नायक, वेशभुशा गीता बांबोळकार आनी नताशा महाले, माची मांडावळ किरण नायक आनी योगेश कापडी हांचो आस्पाव आशिल्लो.
सिद्धी उपाध्ये हांणी सूत्रनिवेदन केलें. कला अकादमीचे वांगडी सचीव शंकर गांवकार हांणी येवकार दिलो. प्रदीप गांवकार हांणी उपकार मानले.
पाडेली वैकुंठ नायक हेच गुरू : पुंडलीक नायक
मराठी मुळावे शाळेंत शिकतना हांव घरांत मराठी नाटकांतले संवाद व्हडल्यान वाचतालो. लागीं आशिल्ल्या पाडेल्यान म्हजे संवाद आयकले. हे संवाद खंयच्या नाटकांतले आसा, अशें तांणी विचारलें. हांवें सांगलें, शहा शिवाजी नाटकांतले. तुजे संवाद खंय आसात? असो प्रस्न तांणी केलो. हांगाच म्हाका उर्बा मेळ्ळी आनी हांव कोंकणी लेखक जालो. वैकुंठ नायक हेच म्हजे गुरू, अशें ह्या वेळार पुंडलीक नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
