कला अकादेमीच्या नूतनीकरणा वयल्यान मंत्री गावडे हांचेर आरोप करप चुकीचेंः रवींद्र आमोणकार
भांगरभूंय | प्रतिनिधी
‘गोवा कलाकार एकवट’ चो मंत्री गावडे आनी मुख्यमंत्र्यान घेतिल्ले भुमिकेक तेंको
पणजी ः कला अकादेमीच्या नूतनीकरणा वयल्यान सुरु जाल्लो वाद सामको अर्थहीण आसा. कांय जाण कला अकादेमीचे अध्यक्ष, मंत्री गोविंद गावडे हांकां कारण नासतना लक्ष्य करतात, असो दावो ‘गोवा कलाकार एकवट’ खाला जमिल्ल्या कलाकारांनी केलो. पणजेच्या इन्स्टिट्यूट मिनेझीस ब्रागांझा सभाघरांत जाल्ले हे बसकेंत ‘गोवा कलाकार एकवट’ च्या सगल्या कलाकार पदाधिकार्यांनी मंत्री गोविंद गावडे आनी मुख्यमंत्री डॉ. प्रमोद सावंत हांणी घेतिल्ल्या भुमिकेक तेंको दिलो.
ह्या वेळार ज्येश्ठ अभिनेतो रवींद्र आमोणकार, गायक शौनक अभिषेकी, गायक प्रवीण गांवकार, नाटककार सुकुर दी क्रूझ, देवीदास गांवकार, हेमा सरदेसाय, आदले मंत्री आनी गायक विनोद पालयेकार, जागर संघटनेचे अध्यक्ष महेश गावडे, नरेश कडकडे, शैलेश बोरकार, नम्रता नायक आनी हेर लोक हाजीर आशिल्ले.
कला अकादेमीच्या नूतनीकरणा वयल्यान जे कलाकार मंत्री गावडे हांचेर आरोप करता तांचो अजेंडा आतां उक्तो जाला. राज्यांतले खरे कलाकार हे बाबतींत मंत्री गावडे वांगडा घट्ट उबे आसात अशें रवींद्र आमोणकार हांणी सांगलें. स्वता कलाकार आशिल्ल्या कला आनी संस्कृती मंत्री गोविंद गावडे हांकां कलाकारांची जतनाय आसा. देखूनच तांणी कला अकादेमीच्या नूतनीकरणाचो निर्णय घेतलो. कला अकादेमीची इमारत 50 वर्सां पोरणी आशिल्ल्यान ती मोडून नवी बांदची असो अहवाल सरकाराक आयिल्लो. पूण तांचे वयल्यान वाद जावचो न्हय म्हणून सरकारान हे इमारतीचें नूतनीकरण करपाचें थारायलें. कला अकादेमीच्या नूतनीकरणाक तीन वर्सां लागलीं. हाका लागून कलाकारांक त्रास जाले हें खरें आसलें तरी मंत्री गावडे हांणी कलाकारां खातीर ती नव्यान स्थापन केली हें न्हयकारूंक फावना. देखून तांचो राजिनामो मागप सामकें चुकीचें अशें आमोणकार हांणी सांगलें.
कला अकादेमीच्या नूतनीकरणा वयल्यान सुरू जाल्लो वाद आमी पळयताले, पूण सरकार जें करता तें फुडले पिळगेच्या कलाकारां खातीर निश्चीतपणान बरें आसा हें कळटकच आमी शांत रावले अशेंय तांणी सांगलें. मजगतीं, कला अकादेमी वयल्यान सुरु जाल्लो वाद चर्चेंतल्यान सुटावो जावप गरजेचें आसा. ध्वनी प्रणाली वा लायटी संबंदीत समस्या आसल्यार ताचेर चर्चा करून त्यो सोडोवंक मेळटात. ताचे वयल्यान आरोप करप चुकीचें अशें गायक प्रवीण गांवकार हांणी सांगलें. ह्या विशयाचेर मंत्री गावडे आनी सरकारान घेतिल्ले भुमिकेक हाजीर आशिल्ल्या सगळ्यां मानेस्तांनी जाहीर तेंको दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
