भांगरभूंय | प्रतिनिधी
वर्स जाल्ले खातीर कोसळिल्ल्या पांख्याक ओंपतले आर्गां
पणजी: कला अकादमीच्या उक्त्या नाट्य घराचें पांखें कोसळिल्ल्याक १७ जुलयाक वर्स पुराय जाता. त्या निमतान कला राखण मांड बुधवार, १७ वेर ‘द क्राय’ ही संकल्पना घेवन कला सादरीकरणांतल्यान कला अकादमीक कलात्मक आर्गां ओंपतले.
फाल्यां सांजेवेळार ६ वरांचेर फकत अर्ध्या वराची ही कार्यावळ अकादमीच्या कोसळिल्ल्या पांख्या खाला रंगमाचयेर जावपाची आशिल्ली. पूण, कला अकादेमीन कलाकारांक थंय वचपाक बंदी घाल्ल्यान आतां ती अकादेमीचे गेटी मुखार जातली.
चित्रकार हर्षदा केरकार, तियात्रिस्ट फ्रांसिस द तुयें, नाट्यकलाकार प्रशांती तळपणकार आनी राजदीप नायक, गायक साईश पाणंदीकार आनी नृत्यकलाकार सेसिल रॉड्रिग्स कला सादर करतलीं. कार्यावळीचें संचालन ज्येश्ठ नाट्यकर्मी ज्ञानेश मोघे करतले.
गोंयचे कलाकार ह्या कोसळिल्ल्या नाट्य घराक कलात्मक पद्धतीन आर्गां ओंपपा खातीर वतले. हें कळोवपा खातीर कला राखण मांडचें एक शिष्टमंडळ लिखीत पत्र घेवन सोमारा कला अकादमीच्या वांगडी सचिवांक मेळिल्ले. मात ताका जाप म्हणून हे माचये कडेन वचपाक लोकांक बंदी घाल्या अशें आयज वांगडी सचिवान सांगलें.
ह्या सादरीकरणांतल्यान कलाकार मुखेलपणान कलाकारांचो जावपी घुस्मट सादर करतले. भ्रश्टाचाराक लागून सरकारी मालकेच्या सांस्कृतीक केंद्रांचें जाल्लें लुकसाण आनी कला- संस्कृती कडेन सरकाराची उबगल्ली नदर हाचे विशींय हें कलात्मक ‘रुदन’ आसतलें.
ही कार्यावळ सगळ्यां खातीर उक्ती आसा. गोंयच्या कला मोगींनी व्हडा संख्येन हे कार्यावळीक हाजीर रावपाचो उलो कला राखण मांडान मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
