भांगरभूंय | प्रतिनिधी
आयज मनरिजवण संस्थेचे कचेरेंत जातली बसका
पणजी : कला अकादमी नुतनीकरणाच्या कामाचो नियाळ घेवपा खातीर सरकारान स्थापन केल्लें कृती दळ आयज तज्ञांचे हाजिरेंत कंत्राटदारां कडल्यान कामाची म्हायती घेतलें. कामा खातीर जारी केल्ल्या निविदेचो तपशील आनी प्रत्यक्ष काम हाचे विशीं वांगडी कंत्राटदारांचे स्पश्टीकरण आयकून घेतले.
कृती दळाचे अध्यक्ष विजय केंकरे हांच्या फुडारपणा खाला आयज सकाळीं कृती दळाची बसका मनरिजवण संस्थेचे कचेरेंत जातली, अशी म्हायती कृती दळाच्या वांगड्यांनी दिली. कृती दळान कला अकादमीची पळोवणी केले उपरांत एकदां बसका घेतल्या. आयज जावपी कृती दळाची दुसरी बसका आसा. आयचे बसकेक कंत्राटदारांची उपस्थिती आसतली, अशी म्हायती कृती दळाचे वांगडी देविदास आमोणकार हांणी दिली.
कला अकादमीची दुरुस्ती तशेंच नुतनीकरणाचेर सराकारान 60 कोटीं परस चड पयशे खर्च केल्यात. दुरुस्ती तशेंच नुतनीकरणाच्या कामाचेर कलाकार तशेंच चार्ल्स कुरैय्या फावंडेशन समाधानी ना. दुरुस्ती तशेंच नुतनीकरणाच्या कामाची सरकारान चवकशी करची, अशी मागणी कला राखोण मांड तशेंच हेर संस्थांनी केली. मुख्यमंत्री डॉ. प्रमोद सावंत हांची भेट घेवन तांणी ही मागणी केली. हाचे उपरांत कला अकादमीची पळोवणी करून अहवाल सादर करपा खातीर मुख्यमंत्र्यांनी कलाकारांच्या कृती दळाची स्थापना केली. विजय केंकरे हे कृती दळाचे अध्यक्ष आसात. सरकार आनी कृती दळा मदले समन्वय अधिकारी म्हूण प्रसाद लोलयेंकार हांची नेमणूक जाल्या. समिती पळोवणी तशेंच अभ्यास करून सरकाराक अहवाल सादर करतली.
आयचे बसकेक कृती दळाच्या वांगड्यां सयत लायट्स, सावंड ह्या वाठारातल्या तज्ञांची उपस्थिती आसतली. दीनानाथ मंगेशकार सभाघराची स्टेज तशेच कदेला विशीं कृती दळाच्या वांगड्यांनी असमाधान उक्तायलें. नुतनीकरण तशेंच दुरुस्तीच्या कामाक कृती दळ पास जावपा इतले लेगीत गूण दिवंक शकना अशें मत पळोवणे उपरांत विजय केंकरे हांणी उक्तायिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
