भांगरभूंय | प्रतिनिधी
उपरांत अकादमी बंद करपा विशीं जातलो निर्णय
पणजी : दुरुस्ती उपरांत कला अकादमीच्या कामांत १८ क्षेत्रांनी दोश आशिल्ल्याचो अहवाल तज्ञ कृती दळ पंगडान दिले उपरांत कला अकादमीची आतां परतून दुरुस्ती जातली. आयआयटी मद्रास ही संस्था दुरुस्ती कामाचो एस्टीमेट सादर करतली. ह्यान पयलीं भौशीक बांदकाम खातें आनी हेर तज्ञां वरवीं फाल्यां १६ तारखे सावन अकादमीची पळोवणी जातली. कला अकादमीचे अध्यक्ष चंद्रकांत कवळेकार हांणी ही म्हायती दिली.
कला अकादमीच्या दुरुस्ती विशिंचो एस्टीमेट आयआयटी मद्रास ही संस्था सादर करतली. एस्टीमेट सादर केल्या उपरांत भौशीक बांधकाम खात्या वरवीं निविदा जारी जातली. फकत बांधकाम दुरुस्ती विशिंचो एस्टीमेट आयआयटी मद्रास संस्था सादर करतली. सावंड, लायटनिंग विशीं हेर तज्ज्ञ एस्टीमेट सादर करतले.
दुरुस्ती खातीर पयलीं दिनानाथ मंगेशकर सभाघर बंद दवरतले. हेर फांटे सूरू उरतले. केन्ना सावन आनी कितले दीस अकादमी बंद उरतली हें पळोवणी उपरांत थारतलें. तज्ञां वरवीं पळोवणी केल्या उपरांत फुडले सोपस्कार थारतले, अशें कला अकादमीचे अध्यक्ष चंद्रकांत कवळेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
