भांगरभूंय | प्रतिनिधी
सीबीटी निकाल जाहीर
पणजी : कर्मचारी भरती आयोगान अवल कारकून, म्हायती साहाय्यक, उद्येग निरीक्षक, स्टोर कीपर, पंचायत सचीव, तलाठी ह्या पदा खातीर घेतिल्ले पयले सीबीटीचो हंगामी निकाल जाहीर केला. निकाल आयोगाचे वेबसायटीचेर आशिल्ल्यान निकालाविशींच्यो कागाळी वा हरकती इमेलाचेर घेवचे नात. कागाळीविशींचो अर्ज भरून तो शुल्कासयत ७ मे मेरेन सादर करचो पडटलो, अशें आयोगान कळीत केलां.
कर्मचारी भरती आयोगान पंचायत सचीव (२६ पदां), तलाठी (३० पदां), एकाऊंट क्लार्क (१२ पदां), अवल कारकून (१२ पदां) सयत हेर पदां खातीर ५ डिसेंबर २०२५ दिसा जायरात दिल्ली. हातून लॅबोरेटरी असीस्टंट, इन्वेस्टीगेटर तशेंच हेर पदां आशिल्लीं. हातुंतल्या तलाठी, पंचायत सचीव, एकावंट्स क्लार्क ह्या पदां खातीर पयली सीबीटी परीक्षा २५, २६ एप्रील आनी २,३ मे २०२६ हे दिसांनी जाली. ह्या परीक्षांचो हंगामी निकाल जाहीर जाला.
परीक्षेतल्या निकालाविशीं कागाळी वा हरकती आसत जाल्यार त्यो अर्ज भरून ७ मे २०२६ मेरेन सादर करप गरजेचें. इमेलाचेर आयिल्ल्या कागाळींचो आयोग विचार करचो ना. कागाळींच्या अर्जाचो नमुनो संकेतथळाचेर उपलब्ध आसा, अशें आयोगान कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
