भांगरभूंय | प्रतिनिधी
पणजी : गोंयांत स्थायीक जाल्ल्या कर्नाटकांतल्या नागरिकांचे मागणे उपरांत कर्नाटक सरकारान जायरात करून वेर्णा वा वास्को वाठारांतल्या इत्सूक जमीन धनयां कडल्यान गोंयांत सांस्कृतीक सभाघर उबारपा खातीर १० हजार चौखण मिटर जमीन मागल्या. ही जायरात कर्नाटक शिमे वाठार उदरगत प्राधिकरण वतीन जाहीर केल्या.
हे जायरातींत इत्सूक जमीन धनयांनी आनी बिल्डर्सांनी दिल्ले ईमेल वा मोबायल क्रमांकांतल्यान व्हॉट्सऍपा वरवीं संपर्क करचो अशें म्हणलां.
जायराती प्रमाण; इत्सूक जमीन धनी तशेंच बिल्डरांनी संबंदीत जमनीची पुराय म्हायती, जीपीएस फोटो सयत धाडची. तशेंच जमनीचो कसलोच न्याय प्रविश्ठ वाद आसचो न्हय. तशेंच रस्त्या सावन उत्कृश्ठ कनेक्टिव्हिटी आसची आनी जमीन सांस्कृतीक सभागृह उबारपाक योग्य आसची अशें जायरातींत म्हणलां.
इत्सुकांनी गरजेच्या कागदपत्रां सयत जायरात दिल्ल्या प्राधिकरणाच्या बंगळुरुच्या नाम्यार संपर्क करपाचो उलो मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
