भांगरभूंय | प्रतिनिधी
कर्नाटक वेंचणुकेचो काल निकाल लागलो. वेंचणुकेच्या निमतान गोंयचे प्रादेशीक अस्मितेचें कशें घट्टण चालू आसा, तेंय बेस बरें लोकां मुखार आयलें. जे लोक कुशेंसान चित्तात तांकां कर्नाटक आनी गोंयची अस्मिता हांचो कसो संबंध आसा हें सांगपाची गरज ना. मात, आमच्या समाजांत असोय एक मोठो घटक आसा, जाचे तकलेंत गजाली, विचार घालचे पडटात, मागीरुच तांकां ते कळटात, म्हूण हो खटाटोप.
थोड्या काळा खातीर फ्लॅशब्लॅकांत वचूया. पोरूं जुनांत कारवारांत कन्नड रक्षण वेदिकेच्या वावुरप्यांनी थंयच्या कोंकणी भाशेंतल्या फलकांक काळे फाशिंल्लें. कोंकणी ही गोंयची राजभास…. आनी कोंकणी भाशक, उलोवपी लोक हे मालवण ते मंगळूर, फुडें कोची मेरेन आसात. कर्नांटकातले कन्नड रक्षण वेदिके संघटनेक कोंकणीचो दुस्वास. मात अशें आसतनाय कारवारच्या स्वाभिमानी कोंकणी उलोवप्यांनी वेदिकेच्या वावुरप्यांचो उक्तेपणान निशेध उक्तायलो. आनी त्याच कर्नाटकांत आनी खुद्द कारवार जिल्ल्यांत वचून गोंयचे कांय भाजपा फुडारी कन्नडात प्रचार करुन तांच्या उमेदवारां खातीर मतां मागताले. केदें हें दुर्दैव. आरे सभाग्यांनो, तुमची आवयभास आशिल्ले कोंकणीचो ह्याच कारवारांत कांय म्हयन्यां फाटी गळो अंदताले थंयच तुमी वचून कन्नडींत मतांची भीक मागतात? ज्या वेळार वेदिकेच्या वावुरप्यांनी कोंकणीच्या फलकाक काळे फासलें, तेन्ना मात ह्या फुडाऱ्यांच्या तोंडांतल्यान कोंकणी खातीर एक उतर सुद्धा येवंक नाशिल्लें.
गोंयाक कोंकणी राजभास आंदोलन, ओपिनियन पोल हे सारकिल्ल्या ज्वलंत प्रादेशीक अस्मितेच्या लढ्यांचो इतिहास आसा. त्याच गोंयांत सद्याच्या राज्यकर्त्यां कडल्यान जर आवयभास कोंकणीचो कांयच आदर जायना आसत जाल्यार ताचे परस चड लजेची दुसरी गजाल ना. बरें इतलेंय करुन लोकांनी कौल दिलो? ना. जेन्ना आमी आमचे स्वताचे आवयक विसरता तेन्ना तुमी दुसऱ्याचे आवयचे कितलेय गोडवे गायले तरी ताचो कांयच उपेग नासता, हे सिद्ध जालें.
दुसरो गोंयचे अस्मितेचो सद्याचो ज्वलंत विशय म्हळ्यार आमची म्हादय. एके वाटेन आमी कर्नाटकान आमची म्हादय व्हेली म्हूण हुयेली मारतात, मात तेच वेळार आमी कर्नाटकांत प्रचारांत स्वताक झोकून दितात. जेन्ना आमचे आवयचो विशय आसा तेन्ना गोंयचे फुडारी आपल्या केंद्रीय फुडाऱ्यांक सांगूक कित्याक शकले नात की आपूण उक्तेपणान कर्नाटकातल्या प्रचारांत वांटेकार जायना म्हूण? कांय सगल्यांनीच लोकांक गृहीत धरल्यात? सद्याची परिस्थिती पळयल्यार हेंच दिसून येता की राजकारण्यांक लोकांचें कोंत ना. म्हादय सगळ्यांत चड लागता सत्तरी म्हालातल्या लोकांक. आतां मेरेनचो नियाळ घेत जाल्यार थंयचे लोकप्रतिनिधी म्हादय बाबतींत तितले गंभीर नात हें दिसता. मात कर्नाटक वेंचणुकेच्या निमतान थळावे, तालुको पातळी वेलेय फुडारी गंभीर नात, हें उक्ताडार आयलें. सत्तरींतले जायते थळावे फुडारी प्रचाराक कर्नाटकात गेल्ले. स्वताक राजकी दाव्याक बांदून घेतल्यांक कसली लागता म्हादय- बिदय?
जी गत भाजपाची तीच काँग्रेसीची. काँग्रेसीच्या फुडाऱ्यांनी तेंच केलें. पयलीं म्हादयच्या विशयाचेर भाजपा आड जायतो बोवाळ मारलो आनी उपरांत हळूच राज्यांतले काँग्रेस फुडारी कर्नाटकांत प्रचारांत दिसले. वेल्यान भाजपा परस चड आश्वासनां म्हादयचे बाबतीत काँग्रेसीन कन्नडिगांक दिल्यात. गोंयचे काँग्रेस प्रदेशाध्यक्ष अमीत पाटकर म्हण्टात की गोंय काँग्रेसीची भुमिका ही म्हादय वाटेनूच आसतली जरी कर्नाटकांत काँग्रेसीची सत्ता आयली तरी. पाटकार हांचें हें वक्तव्य कितलें खरें तें येणारो भविश्य काळूच सांगतलो.
आतां हाचेर कांय देड शाणे युक्तीवाद करपाक शकतात. आरे, आमचो देश हो एक. सगळे जाण हांगासर एकामेकांचे भाव, भयणी आसात. अशे तरेन भाशीक आनी प्रांतीक भेदभाव जावपाक शकना आनी हेर कितें कितें….! कांय जाण म्हण्टले तशें जाल्यार आमचें गोंय भाजी, फळां हे गजालीं खातीर कर्नाटकातल्या बेळगांवीचेर निंबून आसा ताचें कितें? हय, हें खरे, मात तेय हो म्हाल विकपा खातीर आमचेरुय तितलेच निंबून आसात, हेंय आमी मतींत दवरपाक जाय. आनी धरा तांचे कडल्यान येवपी भाजी, फळां बंद जाली जाल्यार पिकोवनी आमच्या गोंयकारांक. येवनी तो वेळ. ते निमतान आमी खऱ्या अर्थान स्वयंपूर्ण जातले.
जेन्ना आमी सिस्टमीक दोश दितात तेन्ना कांय बोटा ही आमचे कडेनूय येतात. धरा राजकारण्यांक कांय पडिल्लें ना. मात लोकांक तरी खंय पडलां? खेदाची गजाल म्हळ्यार जे कोंकणी फलकांक कारवारांत काळें फासलें त्या कारवारांत वचून गोंयच्या कोंकणी मोगींनी, कोंकणी फुडाऱ्यांनी, कोणीच थंय वचून हे गजालीचो निशेध कित्याक करुंक ना? म्हादयचे बाबतीत खुद्द सत्तरी म्हालांतले लोक फुडाऱ्यांच्या चेंपणा खाला कित्याक आसात? इंग्लिशीत एक वाक्य आसा, ‘In a democracy, people get the government they deserve and they deserve what they get’. आयची सद्यस्थिती सांगपाक हें एक वाक्य पुरो.
भारत हो सार्वभौम देश. सगळे मान्य आसा. मात भाशीक, प्रांतीक, सैमीक आनी हेर विविधताय हीच आमच्या देशाची ताकद आनी वळख जावन आसा. गोंयाक तर प्रादेशीक अस्मितेचो व्हड इतिहास आसा. आमी जर सुवार्था खातीर प्रादेशीक अस्मितेच्या प्रस्नां कडे आडनदर केली जाल्यार आमचें सद्याक जे थोडे ओरिजीनल गोंय शाबूत आसा तेंय काबार जातलें आनी फुडली पिळगी हे खातीर आमकां केन्नाच माफ करची ना.
विश्वनाथ नेने
9604039519
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
