भांगरभूंय | प्रतिनिधी
म्हापशें: करासवाडो- म्हापशेंच्या म्हामार्गार पार्क केल्ल्या कंटेनराक गाडयेन धपको दिल्ल्यान सातारा महाराष्ट्रांतले ७ पर्यटक जखमी जाले. हातूंत गंभीर जखमी जाल्ल्या तिगांचेर गोमेकाँत उपचार करतात. अपघाता उपरांत कंटेनर ड्रायव्हरान कंटेनर घेवन पळ काडिल्ल्यान ताचो सोद पुलीस घेतात.
जखमी जाल्ल्यां मदीं गणपत काशिद (४७), सचिन फाळके (४७), उदय भोसले (४५), प्रमोद झंजने (४७), धर्मेंद्र फाळके (४८), प्रमोद जाधव (४८) आनी शंकर आराटे (४७) हांचो आसपाव आसा. हातुंतले गणपत, सचिन आनी उदय हे गंभीर जखमी आसात. तांचेर बांबोळे उपचार सुरू आसात. हेरांक उपचार करून धाडल्यात.
चड म्हायती प्रमाण, हो अपघात आयज मंगळवारा फांतोडेर ५.३० वरांचेर घडलो. एमएच ०५ सीएम ४९१४ नंबराची अर्टिगा गाडी घेवन हे इश्ट गोंयचे भोंवडेर येताले. गाडी बांदेकार पेट्रोलपंप लागसार पावतांच ड्रायव्हर शंकर आराटे हाका म्हामार्गार पार्क केल्ल्या कंटेनराचो अदमास येवंक नाशिल्ल्यान गाडयेचो नेटाचो धपको कंटेनराक बसलो.
गाडयेंतले सातूय इश्ट जखमी जाले. आशिकुशीकच्या लोकांनी घडणुके सुवातेर येवन जखमींक गाडयेंतल्यान भायर काडले. मात गाडयेच्या मुखारच्या आडकल्ल्या दोगांक म्हापशें उजो पालोवपी दळाच्या जवानांनी भायर काडले आनी जिल्लो हॉस्पिटलांत व्हेले. म्हापशेंचे पुलीस हवालदार नंदू कुडासकार हांणी वांगड्यां सयत पंचनामो केलो. पुलीस पळून गेल्ल्या कंटेनर ड्रायव्हराचो सोद घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
