भांगरभूंय | प्रतिनिधी
मडगांव, प्रतिनिधी : कोकण रेल्वे मार्गार आशिल्ल्या करमळी रेल्वे स्टेशनाचेर लेक व्ह्यू रेस्टॉरंट उबारतले. तशेंच मडगांव स्टेशना सयत हेर म्हत्वाच्या स्टेशनांचेर रेंट- अ- बायक सुविधा सुरू करतले, अशी म्हायती कोकण रेल्वे कॉर्पोरेशनाचे मुखेल वेवस्थापकीय संचालक संतोष कुमार झा हांणी दिली.
झा हांणी अधिकृतपणान कोकण रेल्वे कॉर्पोरेशन लिमिटेडचे नवे अध्यक्ष आनी वेवस्थापकीय संचालक म्हणून पदभार स्विकारला. ते १९९२ च्या बॅचचे भारतीय रेल्वे येरादारी सेवा अधिकारी जावन आसात. खर निवड प्रक्रिये उपरांत १ नोव्हेंबर २०१३ दिसा ह्या पदाचेर तांची नियुक्ती निश्चीत जाली.
ऑपरेशन्स, इन्फ्रास्ट्रक्चर प्लॅनींग आनी बिझनेस डेव्हलपमेंटांत २८ वर्सांचो अणभव आशिल्ले झा हांणी आदीं संचलन आनी वेवसायीक संचालक म्हणून काम केलां. पदभार स्विकारल्या उपरांत झा हांणी कोकण रेल्वेच्या फुडारा खातीर विवीध निर्णय घेवपाक सुरवात केल्या. कोकण रेल्वे मार्गार प्रवाशांची सुरक्षिताय आनी तांकां बरो अणभव दिवपाचो उद्देश आसा अशें तांणी सांगलें. ते प्रमाण विवीध कामांक सुरुवात केल्ल्याचेंय तांणी स्पश्ट केलें.
महामंडळाच्या यत्नांचेर उलयतना तांणी सांगलें, आमी नेपाळांतल्या डेमू ट्रेन आनी नवी मुंबय मेट्रो खातीर ऑपरेशन्स आनी मेंटेनन्साचो ठेको मेळयला. ताणें केनियांत सहकार्या खातीर चर्चा सुरू आसा. तशेंच कोकण रेल्वे कॉर्पोरेशन लिमिटेडाक संवसारीक पांवड्यार व्हरपाचे यत्न आसा अशें सांगलें.
मडगांवां सयत सात स्टेशनांचेर रेंट अ बायक सेवा!
कोकण रेल्वे मार्गा वयल्या सात स्टेशनांचेर रेंट-अ-बायक सेवा चलोवपा खातीर ऑपरेटर सोदपाक निविदा जारी केल्यात. गोंयच्या मडगांव, थिवी, करमळी, काणकोणा वांगडा कर्नाटक राज्यांतल्या कारवार, गोकर्ण रोड आनी कुमटा रेल्वे स्टेशनाचेर ही सेवा सुरू जातली. सगळ्या सात स्टेशनां खातीर एकाच करारा वरवीं चलयतले. परवानोधारक दुचाकींक ३०० चौरसफूट जागो उपलब्ध करून भाड्यान दुचाकी उपलब्ध करतले. १८ जून ही निविदेची निमाणी तारीख.
मडगांवां रेल आर्केडचें काम सुरू
मडगांव रेल्वेस्टेशनाच्या प्रवेशदारा लागसारा बसस्टॅण्डा खातीर उबारिल्ले शेडिचे सुवातेर आतां रेल आर्केडचें काम सुरु आसा. ताका लागून ठेकेदाराचें शेड उबारपाचें काम चालू आसा. ह्या रेल आर्केडांत विवीध वस्तू, खावपाचे जिन्नस एकेच सुवातेर उपलब्ध जातले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
