भांगरभूंय | प्रतिनिधी
भांगरभूंय । प्रतिनिधी
माशेलः करमळेच्या सकयल्या भाटांतल्या मेघनाथ आनी दत्ता मुरगांवकार हांच्या घरांचेर आयतारा फांतोडेर पिंपळाचें झाड हुमटून पडिल्ल्यान व्हड लुकसाण जालें.
दुर्घटनेची म्हायती मेळटाच कुमारजुवेंचे आमदार राजेश फळदेसाय हांणी ताकतिकेन घडणुके सुवातेचेर वचून परिस्थितीची पळोवणी केली. तशेंच लुकसाणेचो नियाळ घेतलो.
पोरणें गोंय उजो पालोवपी दळाचे आनी आपत्कालीन विभागाचे कर्मचारीय खबर मेळटाच घडणुकेचे सुवातेचेर पावले. झाड पडिल्ल्यान घराच्या पाख्याचें लुकसाण जालें, तशेंच नळे फुटले आनी वाशेय मोडले. झाड पडटना विजेच्या सरयांचेर पडिल्ल्यान त्योवूय तुटल्यो आनी त्या वाठारांतली वीज पुरवण खंडीत जाली.
घर धनयांक घराचे दुरुस्ती खातीर गरजेची सगळी मजत करपाचें आस्वासन आमदार फळदेसाय हांणी दिलें. जॉन बोर्जेस सयत करमळीचे पंच कुष्टा सालेलकार आनी हेर मानेस्त ह्या वेळार हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.