करमल घांटार 22 सायलाचीं झाडां अनवळख्यांनी कापलीं

भांगरभूंय | प्रतिनिधी

काणकोण: करलम घांटार रान खात्याच्या मालकीचीं 22 सायलाचीं झाडां काळखाचो फायदो घेवन अनवळख्यांनी कापलीं. करमल घांटार वांकडें मोडण हें घातक व्हॉल्त दुरुस्त करपा खातीर हीं झाडां आडखळ थारतालीं, आनी तीं कापपा खातीर रान खात्यान हाचे पयलींच मार्क केल्लीं. पूण तीं झाडां संबंदीत खात्यान कापचे पयलींच अनवळख्यांनी तीं कापून संबंदीत खात्याच्या कंत्राटदाराक एक तरेचो आदारूच केला.

हे संबंदी विभागीय रान अधिकारी आनंद मेस्त्री हांकां विचारलें तेन्ना ह्या कापिल्ल्या झाडांचो पंचनामो केला आनी अनवळखी मनशांनी जीं झाडां कांपल्यांत तीं कापून व्हरूंक नात. तांचो उद्देश कितें आशिल्लो तें कळूंक शकलें ना. अशें सांगून तांणी कापिल्लीं झाडां जप्त करून हतीपालव हांगासरल्या डेपोंत दवरतले अशें तांणी म्हणलें.