भांगरभूंय | प्रतिनिधी
पणजी, बातमीदार ः करदात्यांचो पयसो फुकट घालोवप होच प्रधानमंत्री नरेंद्र मोदींचो ‘विकसीत भारत’ काय हाची जाप म्हजे प्रतिस्पर्धी उमेदवार श्रीपाद नायक गोंयकारांक दितले कांय? भौशीक निधी असो फुकट घालप बरोबर? पणजी स्मार्ट सिटींत गोंदळ जाले उपरांत आतां सांगोल्डा बेजबाबदारपणान काम सुरू आसा. 2004 ची इंडिया शायनिंग विसरूं नाकात अशी शिटकावणी काँग्रेसीचे उत्तर गोंयचे उमेदवार ॲड. रमाकांत खलप हांणी भाजपाक दिलो.
सांगोल्डा पियेवपाच्या उदकाच्या लायनीचेर बांदिल्ल्या घाणयाऱ्या उदकाचे चेंबरचे फोटो प्रसिद्ध करुन ॲड. खलप हांणी भाजप सरकार निकृश्ट दर्जाची कामां करता अशी टिका केल्या. ‘मिशन टोटल कमिशन’ हें भाजपा सरकाराचें धोरण. लोकांची भलायकी आनी सुरक्षेची तांकां कांयच पर्वा ना. केंद्रीय मंत्री श्रीपाद नायक हांणी भाजपान हातांत घेतिल्लो एक तरी प्रकल्प दाखोवचो जो दर्जेदार आसा अशें आव्हान अॅड. खलप हांणी दिल्लें.
भाजपा सरकाराच्या प्रकल्पांक फक्त स म्हयन्यांत वेरो पडटात, पांखीं कोसळटात, फक्त स म्हयन्यांत जमनी वयले टायल्स भायर येतात. भाजपाच्या प्रकल्पांक खातीर गॅरंटी आनी वॉरंटी ना अशें अॅड. खलप हांणी सांगलें.
नवो पाटो पूल, अटल सेतू, पणजी स्मार्ट सिटी, कला अकादेमी रिनोव्हेशन, दक्षीण गोंय जिल्लो हॉस्पिटल, नवो जुवारी पूल, पत्रादेवी ते पर्वरी हायवे, लुसोफोनिया आनी राष्ट्रीय खेळां खातीर बांदिल्लें स्टेडियम हे सगळे प्रकल्प भ्रश्टाचाराचीं उदाहरणां आसात असो दावोय खलप हांणी केलो.
भाजपाक कायमचो धडो शिकवपाचो वेळ आयला. सगळ्या पांवड्यार अपेस आयिल्ल्या भाजपाक सत्तेर रावपाचो अधिकार ना अशेंय अॅड. खलपान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
