भांगरभूंय | प्रतिनिधी
पणजी : करंजाळे एका पेट्रोल पंपार इंधन भरले उपरांत पयशांच्या वादांतल्या कर्मचार्यांक बडयले. हो प्रकारण बिरेस्तारा सकाळीं घडलो. वट्ट ६०० रुपयांच्या बिलावेल्यान जाल्ल्या ह्या वादांत पांच दुबावितांक पणजी पुलिसांनी अटक केली.
हे विशीं मेळिल्ले चड म्हायती प्रमाण, करंजाळेच्या गौरीश धोंड हांच्या पेट्रोल पंपार काळे कपडे घालून दुचाकीचेर एक पंगड आयलो. तातुंतल्या एकल्यान गाडयेची टाकी पुराय भरपाक सांगली. कर्मचार्यान ६०० रुपयांचें पेट्रोल भरलें, मात गिरायकान आपले गाडयेंत इतलें पेट्रोल वचप शक्यूच ना, असो दावो करून पयशे दिवपाक न्हयकार दिलो. ताचे मदीं वाद जालो. उपरांत हो वाद मारामारी मेरेन पावलो. त्या पंगडान पेट्रोल पंपावेल्या अटेंडंटाक बरोच बडयलो. आपल्या कर्मचार्याक वाटावपाक धांवत आयिल्ल्या सुपरवायझराकूय तांणी धुकलून मारपेट कली. ह्या हल्ल्यांत दोग कर्मचारी जखमी जाले.
पेट्रोल पंप चालक गौरीश धोंड हांणी, आमी २४ वरां सेवा दितात, मात अश्या कांय लोकांक लागून सुरक्षिततायेचो प्रस्न गंभीर जाला.
हे घडणुके उपरांत पणजी पुलिसांनी सीसीटीव्ही फुटेजीच्या आदारार तपास करून पांच दुबावितांक अटक केली. राज नलकर, आकाश सिंग, क्रिश नावेलकर, मेल्विन ब्रिटो आनी नझीर शेख अशीं तांणीं नांवां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
