भांगरभूंय | प्रतिनिधी
गोंयच्या इतिहासांत पयलेच खेप जमीन लुटप्यांचेर कारवाय, जुवारी जमनी कडेन कसलोच संबंद ना
पणजी ः जमीन हडप करपाच्या प्रकरणांत सरकारान केल्ले खर कारवायेक लागून कांय जाणांची दलाली बंद जाल्या. कमिशन बंद जाल्ल्यान सोशल मिडियाचेर व्हिडीयो घालून तांणी म्हजी बदनामी चलयल्या. हाचे फाटल्यान राजकी हेतूय आसा. पूण भाजपाच्या डबल इंजिन सरकाराचेर गोंयकारांचो पुराय विस्वास आसा. गोंयकारांनी ह्या व्हिडियोंक बळी पडचें न्हय, असो उलो मुख्यमंत्री डाॅ. प्रमोद सावंत हांणी मारला.
गोंयांत बरींच वर्सां जमीन हडप करपाचे प्रकार नेटान चलताले. गोंयां भायर आशिल्ल्या गोंयकारांच्यो जमनी सरकारी अधिकाऱ्यांक, कर्मचाऱ्यांक हाता कडेन धरून हडप करताले. ताची आपूण जावन दखल घेवन म्हजेच कारकिर्दींत पयले खेप कारवाय जाली. आतां मेरेन ५८ जाणांक अटक जाल्या. स सरकारी कर्मचाऱ्यांक निलंबीत केल्यात. ९९ जमनी सरकारान ताब्यांत घेतल्यात. ताका लागून कांय दलालांक व्हडलो फटको बसला. तांचें कमिशन बंद जालां. ह्या प्रकरणांत आनीकूय कांय जाणांचेर कारवाय जातली, अशें डाॅ. सावंत हांणी स्पश्ट केलें. व्हिडियोंत जें कितें सांगतात, ताचेर गोंयकारांनी विस्वास दवरचो न्हय, अशें डाॅ. सावंत हांणी सांगलें.
नोकर भरती आयोग
सरकारी नोकरभरती पारदर्शकपणान जावची म्हूण नोकर भरती आयोगाची स्थापना केल्या. आतां त्या आयोगा वतीन नोकर भरती जाता.
जुआरी जमनी कडेन म्हजो संबंद ना
जुआरी प्रकल्पाक उद्देगीक वापरा खातीर म्हज्या जल्मा पयलींच जमीन दिल्या. जमीन वापरा संबंदीचे प्रक्रियेंत बदल करून कोण नेमान कमिशन घेता तें कांय दिसांनी जाहीर जावपाचें आसा. म्हजो जुआरी जमीन प्रकरणा कडेन कसलोच संबंद ना. भाजपाचें सरकार राज्यांत बरे भशेन काम करता. योग्य अर्थीक वेवस्थापनाक लागून राज्याची अर्थीक स्थिती बरी आसा. राज्यान रीण घेवपाचे मर्यादे परस उणें रीण घेतलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
