कबलातपत्र नुतनीकरण, दुकानां हस्तांतरणाचो निर्णय संचालकाचेर

भांगरभूंय | प्रतिनिधी

म्हापशें पालिकेंत थाराव; पूण नगराध्यक्षूच बसकेंत गैरहाजीर राविल्ल्यान थाराव अर्थहीन

म्हापशें: मार्केटांतल्या पालिकेच्या मालकीचीं दुकानां, स्टॉल्स, गाळे हांच्या भाडेपट्टी कबलातीच्या नुतनीकरणाचेर तशेंच दुकानां रगताच्या नात्यांतले स्टॉल्स आनी दुकानां हस्तांतरण करपाचो निर्णय पालिका संचालक घेतले असो थाराव सगल्यांचे सहमतीन म्हापशें पालिका मंडळाचे बसकेंत घेतलो.

सोमारा सकाळीं नगराध्यक्षा प्रिया मिशाळ हांचे अध्यक्षताये खाला पालिका मंडळाची खाशेली बसका जाली. ह्या वेळार मुख्याधिकारी अमितेश शिरवयकार, उपनगराध्यक्ष विराज फडके, पालिका अभियंतो प्रदीप नार्वेंकार आनी नगरसेवक, नगरसेविका हाजीर आशिल्ल्यो.

ही बसका नगराध्यक्ष प्रिया मिशाळ हांचे अध्यक्षताये खाला जाली. पूण वयल्या थारावा वेळार नगराध्यक्षान उपनगराध्यक्षा कडेन कामकाज दिवन तांचे सयत चार नगरसेवक गैरहाजीर रावले. नगराध्यक्षानूच हे विशय बसके मुखार हाडिल्ल्यान त्यो पालिका कायद्या प्रमाण थाराव संमत करपा वेळार गैरहाजीर रावूंक शकनात. ताका लागून भाडेकार कबलातपत्र नुतनीकरण आनी दुकानांचे हस्तांतरण हे दोनूय थाराव व्यर्थ (नल अ‍ॅण्ड वॉयड) थारतात. हाका लागून थाराव अर्थहीन जाल्ल्यांतूच जमा जाल्यात.

पालिका मंडळा मुखार भाडेकार कबलातपत्र नुतनीकरणाच्याे 195 फायली जाल्यार रगताच्या नात्यांतले स्टॉल्स आनी दुकानां हस्तांतरणाच्यो वट्ट 12 फायलींचो आस्पाव आशिल्लो.

कोयर वेवस्थापना कडेन निगडीत 40 कर्मचाऱ्यांक दिसवडो पद्दतीन घेवप. तशेंच सरकाराच्या आदेशा प्रमाण पावंड किपर म्हूण मनीस संसाधन म्हामंडळाचे 10 कंत्राटी कर्मचारी घेवपाचो थारावूय हे बसकेंत घेतलो.

ह्या दोनूय थारावा वेळार सत्ताधारी आनी विरोधी गटांत खूबसो वेळ चर्चा रंगली. निमाणें मतदानान हे थाराव संमंत केले.

हे बसकेंत गवंडो, पालिका निरिक्षक आनी कनिश्ठ अभियंतो हीं पदां कंत्राटी पद्दतीन भरपी पदांच्या पगाराचेर खूबशी चर्चा जाली. चर्चे उपरांत गवंड्याक 20 हजार, कनिश्ठ अभियंत्याक (अणभवी) 30 हजार आनी पालिका निरिक्षकाक 22 हजार रुपया दरेका म्हयन्याक पगार दिवपाचें थारलें.