भांगरभूंय | प्रतिनिधी
मडगांव, प्रतिनिधी : कदंब बस स्टॅण्डा वेल्यान सुटपी बसींची सदांच गर्दी आसता. हाचोच फायदो घेवन एक तरणाटो एक चलयेचीं फकांडां करतालो. कंडक्टराक सांगूनय कांयच जावंक नाशिल्ल्यान बसींतल्यान देंवून तिणें हे विशीं आपल्या पालकांक सांगलें. उपरांत आमदार क्रुझ सिल्वा हांणी पिडेस्त चलये सयत फातोड्ड्यां पुलिशेंत वचून कागाळ केली. असल्यो गजाली आनीक जावच्यो न्हय म्हणून चलयां खातीर, विद्यार्थ्यां खातीर विशेश बसींची वेवस्था करापची मागणी क्रुझ हांणी केल्या.
आमदार क्रुझ सिल्वा हांणी सोमारा कदंब बसींतल्यान प्रवास केलो. ताचे पयलीं बस स्टॉपाचेर हाजीर आशिल्ल्या विद्यार्थ्यां कडेन संवाद केलो. विद्यार्थ्यांनी बसीचो उणाव आशिल्ल्यान मेळटा ते बसीन प्रवास करता अशें सांगलें. आमदार सिल्वा हांणी, कदंब म्हामंडळा वतीन शाळा आनी म्हाविद्यालयां भरपाचे आनी सुटपाचे वेळेंत गरजेच्यो बसी उपलब्ध नासता. ताका लागून जावपी गर्देचो फायदो कांय जाण घेतात. बायलां आनी चलयांचीं फकांडां करप अश्यो गजाली घडटात. जायते फावट पिडेस्त उलयनाशिल्ल्यान, अश्यो गजाली मुखार येनात.
शुक्रारा ३० ऑगस्टाक कदंब बस स्टॅण्डा वेल्यान म्हाविद्यालया खातीर प्रवास करपी म्हाविद्यालयीन चलयेची एका तरणाट्यान फकांडां केलीं. हे विशीं ते चलयेन गाडयेंतल्या कंडक्टराक सांगलें. मात तांणी कसलीच दखल घेवंक ना. आपलो स्टॉप आयले उपरांत बसींतल्यान देंवून तांणी हे विशीं आपल्या पालकांक सांगलें. पालकांनीय आमदार क्रुझ सिल्वा हांच्या कानार ही गजाल घातले उपरांत तांणी फातोड्ड्यां पुलीस स्टेशनाचेर वचून पिडेस्ता सयत वचून कागाळ केली.
मजगतीं, बसींतल्यान प्रवास करतना कंडक्टर पयशे घेतात मात तिकीट दिनात. असल्योय गजाली जावपाक लागल्यात. ताका लागून हे चलये कडेन तिकेट नाशिल्ली. त्याच बसींतल्यान प्रवास करपी एका चल्या कडल्यान तिकीट घेतली आनी पुलिसांक बसीची म्हायती दिली. फातोड्ड्यां पुलिसांनीय आठ ते णव ह्या वेळार सुटपी हे बसीची म्हायती घेवन कंडक्टराचो सोद घेवपाक सुरवात केली. तशेंच ह्या तरणाट्याची वळख पटल्या उपरांत ताका पुलिसांनी ताब्यांत घेतले. तेन्ना हो तरणाटो वेर्णा कामाक वता. तांणी पयलींय हेर जायत्या चलयांची फकांडां केल्ल्याचे आमदार सिल्वा हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
