भांगरभूंय | प्रतिनिधी
पणजीः कदंब येरादारी म्हामंडळान कदंबाचे बसीं खातीर ड्रायव्हर आनी कंडक्टरांचीं मेळून वट्ट ३०० पदां जाहीर केल्यांत. हीं सगळीं पदां सरळ मुलाखती वरवीं कंत्राटी पध्दतींचेर भरतले, अशी कळोवणी म्हामंडळान जारी केल्या.
३०० पदां मदलीं २०० पदां हीं कडंक्टरा खातीर आसात. तातुंतलीं ९० पदां अनारक्षीत जाल्यार ५४ ओबीसी, २४ एसटी, ४ एससी, २० इडब्ल्युएस, ८ दिव्यांगां खातीर आरक्षीत आसात. जाल्यार १०० पदां हीं जड वाहन चालकां खातीर आसात. तातुंतलीं ४९ पदां अनारक्षीत जाल्यार २७ ओबीसी, १२ एसटी, ०२ एससी आनी १० इडब्ल्युएस खातीर आरक्षीत आसात. कंडक्टर आनी ड्रायव्हर हे दोंगांयचें म्हयन्याळें वेतर रु. २२ हजार आसा.
इत्सुकांनी अदीक तपशील आनी अर्जां खातीर कदंब येरादारी म्हामंडळाचे वॅबसायटीक भेट दिवची. तशेंच आपलो अर्ज विहीत नमुन्यां सयत भरून २५ जुन ते ४ जुलय मजगतीं केटीसीएल, सेंट्रल वर्कशॉप पर्वरे हांगा जावपी सरळ मुलाखतींत सकाळीं ११ ते सांजेवेळार ४ वरां मजगतीं हजर रावचें.
हीं सगळीं पदां एक वर्साचे कंत्राटी पध्दतीचेर भरतले. करार एक वर्साच्या काळा खातीर वैध उरतलो आनी गरज पडल्यार तातूंत वाड जावपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
