कताराचें वादग्रस्त ‘कांतार’

भांगरभूंय | प्रतिनिधी

पयर इराण आनी इंग्लंडाची मॅच जाली. तातूंत इराणाच्या खेळगड्यांनी आपल्या देशाचें राष्ट्रगीत म्हणपाक न्हयकार दिलो. मैदानाचेर राष्ट्रगीत वाजतना एकल्यानूय ओठ पसून हालोवंक नात.

गल्फांतल्या कतार देशांत सध्या संवसारीक करंड फुटबाॅल सर्त चलता. संवसारांतले 32 देश तातूंत वांटेकार जाल्यात. मात, दोन दीस जाता थंय आसा, ही सर्त वादग्रस्त थारल्या. सर्त सुरवात जावचे वर्सभर पयलींच कामगारां वयल्यान वाद जाल्लो. मैदानां आनी हेर साधनसुविधा उबारपी कामगारांक थंय काफला पद्दत लागू केल्ली. तशे कतारांतले 85 टक्के लोक हे भायले. काफला पद्दत म्हणल्यार कामाचे नेम. साबार कंपनीं वरवीं हांगां आयिल्ल्या कामगारांक सर्तीच्या पुरस्कर्त्यांची परवानगी घेतले बगर देश सोडपाक मेळचो ना. नोकरी बदलपाक मेळची ना अशी अट आशिल्ली. मायदेशांत वचपाक पासपोर्ट जाय म्हूण कांय जाणांक पगार मेळ्ळो म्हूण बोगस पत्र बरोवन दिवचें पडलें, अशे जायते आरोप मनीस हक्क संघटना आनी आंतरराष्ट्रीय कामगार संघटना महासंघान केले. तातूंत साडेस हजार कामगारांक मरण आयलें, असोय आरोप आशिल्लो. अजून आरोपांच्यो नाळी थांबूंक ना.
ज्यू खेळगडे, प्रेक्षकांक कोशर अन्न (रवंथ करपी प्राण्यांचें मांस) दिवपाचें आनी जाहीर प्रार्थना सभांचें आस्वासन दिल्लें. मात ऐन वेळार कतार प्रशासन फाटल्यान सरलां, अशी खबर आयल्या. भौशीक जाग्यांचेर जमून प्रार्थना केल्यो तर आमी सुरक्षेची जापसालदारकी घेवपाक शकनात, अशेंय तांणी सांगिल्ल्याच्यो खबरो आसात. धर्मिक रिती, परंपरा सांबाळपी 15 हजारां वयर ज्यु हे सर्तीक आयल्यात. आमकां जेवणूच मेळूंक ना, अशी तांणी कागाळ केल्या. हांकां खावंक मेळूंक ना, तर उरिल्ल्यांची पिवपाची वेवस्था जावंक ना. स्टेडियमांत, आशीकुशीच्या वाठारांनी बियर पिवपाक कतार प्रशासनान बंदी घाल्या. संस्कारी लोकांक हें आवडटलें. मात फुटबाॅल, क्रिकेट खेळटना बियरीचे, थंड पेयाचे टीन घेवन बसपाची विदेशांत पद्दत आसा. संवसारीक करंड फुटबाॅल सर्तीच्या उक्तावणा वेळार सगल्या प्रेक्षकांक भेटवस्तू दिल्ल्यो, तातूंत बियरी सारकी एक बाटली दिसता. (घडये ती शॅंपेन वा वायन आसत.) बियर बंदीक लागून बाकीचे सोडात, पूण खुद्द फिफाचे अधिकृत पुरस्कर्ते बडवायझराचीय अडचण जाल्या. तांकां आपले स्टाॅल आडवाटेक घालचे पडल्यात. हे कंपनीन फिफाक साडेसात कोटी डाॅलरांची देणगी दिल्या. म्हणटकच फिफा संघटनाय कताराच्या निर्णयाक लागून वयर सकयल जातली.
उक्तावणाचे मॅचींत इक्वाडोरान येजमान कताराचो 3 गोलांनी पराभव केलो. ही मॅच फिक्स आशिल्ली, असो आरोप कांय जाणांनी केला. अर्थांत तातूंत तथ्य आसतलेंच अशें ना. कपड्यांचेरुय बंधना आयल्यांत. कतार हो इस्लामी देश. म्हणटकच थंय तीं आसतलींच. सर्त पळोवपाक आयिल्ल्या प्रेक्षकांनी भौशीक जाग्यांचेर धोंपरां मेरेन आनी खांदे धांपतले अशे कपडे घालचे, लिंगीक भावनांचें प्रदर्शन करचें न्हय, अशी शिटकावणी प्रशासनान दिल्या. पश्चिमी प्रेक्षकांक हें कितलें मानवतलें हें कळपाक मार्ग ना.
पयर इराण आनी इंग्लंडाची मॅच जाली. तातूंत इराणाच्या खेळगड्यांनी आपल्या देशाचें राष्ट्रगीत म्हणपाक न्हयकार दिलो. मैदानाचेर राष्ट्रगीत वाजतना एकल्यानूय ओठ पसून हालोवंक नात. इराणीं प्रेक्षकांनी हाचें समर्थन केलां. ही तशी इतिहासीक घडणूक. आमकां आमच्या देशाचो अभिमान आसा, पूण सरकाराचो ना, अशें तांणी खबरां संस्थांक सांगलें. इराणांत फाटल्या सप्टेंबरांत एके 22 वर्सां पिरायेचे चलयेक हिजाब घालूंक ना म्हूण बंदखणींत व्हेली. थंय तिका मरण आयलें. अजून हिजाबा विरोधांत थंय आंदोलन चालू आसा. इराणाच्या प्रेक्षकांनी इराण आनी इराणी बायलांक स्वातंत्र्य दियात, अशे पोस्टर दाखयत मॅच पळयली. इराणांत हाचेर प्रतिक्रिया येतलीच. घडये पंगडांतल्या खेळगड्यांचेर देशद्रोहाची कारवाय जावं येता.
वादग्रस्त भारतीय धर्मगुरू झाकीर नायक हाका कतारांतल्या सरकारी टीव्ही चॅनलान मॅची वेळार धर्मीक शेर्मांव दिवपाक आपयला. ही आमचे नदरेन वादग्रस्त गजाल. कारण झाकीराचेर भारत सरकारान बंदी घाल्या. ताचे वयल्यान आमच्या देशांत तीव्र प्रतिक्रिया येतल्यो, हातूंत दुबाव ना. ताणें पयलेच कार्यावळींत पांच जाणांचें धर्मांतर केलें, असो एक व्हिडियो व्हायरल जाला. तो खरो काय बोगस तें तपासचें पडटलें.
फुटबाॅल सर्तीच्या इतिहासांत पयलेच खेपे संवसारीक करंड फुटबाॅल सर्त इस्लामी देशांत जाता. ते खातीर बरेच लोक बेजार आसतले. ताकाच लागून फकत वादूच उफेवन वयर सरतात आसुये. हें वादांचें कांतार बेगीन सोंपू आनी सगल्यांक मॅचींचो आनंद घेवपाक मेळूं.