भांगरभूंय | प्रतिनिधी
बेळगांवः बेळगांव-गोंय शिमेर आशिल्ल्या खानापूर तालुक्यांतल्या कणकुंबी हांगाच्या अबकारी चेक नाक्यार मंगळारा मध्यान रातीं सुमार 1 वरांचेर अबकारी अधिकाऱ्यांनी 100 रुपया मोलाचो बनावट सोरो जप्त केलो जिल्हो (दक्षीण) अबकारी उपआयुक्त वाय. मंजुनाथ हांचे म्हायती प्रमाण मंगळारा मध्यान रातीं सुमार 1 वरांचेर कणकुंबीच्या अबकारी तपासणी नाक्यार गोंयांतल्यान रिते प्लास्टिकाचे डबे आनी बालद्यो व्हरपी चॉकलेटी रंगाचो आयचर प्रो-2118 कंटेनर आडायलो आनी जीएसटी कागदपत्रांची तपासणी अबकारी अधिकाऱ्यांनी केली.
त्या वेळार गोंयच्यान प्लास्टीक डबे आनी बालद्यो घेवन आयिल्ल्या कंटेनराचो दुबावान सोद घेतलो. उल्लेख केल्ल्या कंटेनरांत बेकायदेशीर सोरो व्हरता अशें दिसून आयलें. अबकारी अधिकाऱ्यांनी जप्त केल्ल्या सोऱ्याचें मोल 48 लाख 96 हजार रुपया आशिल्लें.
जप्त केल्ल्या सोऱ्याचें ब्रँड नांव ‘एव्हर ग्रीन रिझर्व्ह व्हिस्की’. सोऱ्या वांगडाच 35 लाख रुपया मोलाचो कंटेनर आनी 30 हजार रुपया मोलाचे प्लास्टीक डबे आनी बालद्यो अबकारी अधिकाऱ्यांनी जप्त केल्यात. जप्त केल्लो सोऱ्याचो सांठो गोंयांतल्यान घेतात आसलो तरी तो कोण? खंय व्हरताले? तपास पुराय जाले उपरांत हें स्पश्ट जातलें.
शेजारच्या महाराष्ट्र वा कर्नाटक राज्यांनी वेंचणूक जाल्यार आमच्या खात्याच्या अधिकाऱ्यांक आनी कर्मचाऱ्यांक सादूर रावपाक आमी सांगतात. ताकाच लागून आयज सोऱ्याचो इतलो व्हड बेकायदेशीर सांठो मेळ्ळा. खबऱ्या कडल्यान कसलीच म्हायती मेळना तेन्ना हो सोऱ्याचो सांठो जप्त केल्लो हें खाशेलेंपण. अधिकारी आनी कर्मचाऱ्यांक दिल्लें प्रशिक्षण आनी तांच्या अणभवाक लागून हें शक्य आसा अशें मंजुनाथ हांणी म्हणलें.
‘एव्हर ग्रीन रिझर्व्ह व्हिस्की’ अधिकृतपणान फक्त ठाणे महाराष्ट्रांतल्या जस्ट ट्री डिस्टिलरींत तयार जाता. पूण तपासांतल्यान आमकां जप्त केल्लो सोरो महाराष्ट्रांत तयार केल्लो काय गोंयांतलो नकली सोरो हें स्पश्ट जातलें. कारवाय करता आसतना कंटेनर चालक फरार जाल्लो उपरांत ताका अटक केल्या उपरांत कंटेनराच्या मालकाचें नांव जाहीर करतले अशें अबकारी उपआयुक्त मंजुनाथ हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
