भांगरभूंय | प्रतिनिधी
न्हंयेचेर उंच पूल उबारपाची लोकांची मागणी
पेडणें, प्रतिनीधी: कडशी मोपा न्हंयेंक हुंवार आयिल्ल्यान परत ह्या वाठारांतल्या आलतड-पलतडींच्या लोकांचो संपर्क तुटला. भुरग्यांक शाळेंत आनी लोकांक कामाक वचपाक मेळूंक ना. ह्या वाठारांत कडशी न्हंयेचेर जे उणे उंचायेचे पूल उबारिल्ले थंय नवे उंच पूल उबारचे, अशी मागणी ग्रामस्थांनी केल्ली. मात सरकारान आजूनय हाचे कडेन लक्ष घालूंक ना. फाटल्या वर्सा हे न्हंयेंक हुंवार आयिल्लो. तेन्ना ह्या वाठारांतल्या ५० नागरिकांचो संपर्क पुरायेन तुटिल्लो. फाटल्या पंदरा दिसां आदीं अशीच हुंवाराची स्थिती ह्या वाठारांत निर्माण जाल्ली. तशेंच चित्र आयजूय हांगा दिसून आयलां.
फाटल्या वर्सा थळावे आमदार प्रवीण आर्लेकार, मामलेदार, उपजिल्लोधिकारी, सरपंच, तलाठी, जलसिंचन खात्याच्या अधिकार्यांनी ह्या वाठाराक भेट दिवन हुंवाराचे स्थितीची म्हायती जाणून घेतिल्ली. तेन्नाच हांगा पुलाची उंचाय उबारपाची गवाय लोकप्रतिनिधी वांगडा अधिकार्यांनीय ग्रामस्थांक दिल्ली. मात एक वर्सा जावन गेलें तरी आयज मेरेन ह्या पुलाची कार्यवाही जावंक ना. ताका लागून परत अंदूंय हांगच्या लोकांक बरेच त्रास सोंसचे पडले.
सेगीत पडपी पावसाक लागून उणे उंचायेचे जे पूल आशिल्ले त्या पुलां वयल्यान व्हडा प्रमाणांत उदक व्हांवून वता. ताका लागून पलतड मारपाक मेळना. फुडाराक जर असोच पावस पडत रावलो जाल्यार न्हंयेक आयिल्ल्या हुंवाराचें उदक लोकांच्या घरांनी घुसून व्हड घडणूक घडपाची शक्यताय आसा. तशेंच न्हंयेच्या दोनूय वटांनी राखणे वणट उबारून ग्रामस्थांक संरक्षण दिवचें अशी मागणी नागरीक करतात.
हांगच्या विद्यार्थ्यांनी सांगलें, सेगीत पडपी पावसाक लागून आमकां स्कूल, कॉलेजींत वचपाक मेळना. ताका लागून व्हडा प्रमाणांत शिक्षणीक लुकसाण जाता. खंयच्याय वर्ग इश्टां कडल्यान अभ्यास घेवपाचो आसल्यार हांगा नेटवर्कुय सारकें ना. सरकारान हाचेर योग्य तोडगो काडून उंच पूल उबारून लोकांची वेवस्था करची, अशी मागणी विद्यार्थी करतात.
कडशी मोपा वाठारांत हुंवाराची स्थिती निर्माण दरवर्सा पावसांत आसता. कडशी मोपा न्हंयेचेर पूल व्हड उंचायेचो बांदप गरजेचें आशिल्लें. मात थंय उणे उंचायेचो पूल कित्याक बांदलो? हो एक संशोधनाचो विशय जावन पडला. सरकारान पावसा उपरांत तरी हांगा व्हड उंचायेचो पूल उबारचो. जाका लागून हांगच्या लोकांक यो-वच वेवस्थीतपणान मेळटलें, अशी मागणी हांगचे नागरीक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
