भांगरभूंय | प्रतिनिधी
कंबोडिया, खबरां संस्था: कंबोडियांत ५ हजार भारतीय अडकून आसात अशी धक्को दिवपी म्हायती उजवाडाक आयल्या. ५ हजार भारतीयांक नोकरी आनी हेर गजालींचें हांयस दाखोवन फटोवन गुलाम केल्यात. ह्या प्रकरणांत अधिकारी आशिल्ल्याचें दाखोवन लोकांक फटोवन लाखांनी रुपया काडले असोय अदमास आसा. कंबोडियांत पांच हजारां परस चड भारतीयांक कबज्यांत घेवन तांचे कडल्यान बेकायदेशीर कामां करून घेतात. आतां कंबोडियांत अडकल्ल्या भारतीयांची सुटका करपा खातीर केंद्र सरकार यत्न करता.
कंबोडिया हें सायबर गुलामगिरीचें केंद्र मानतात. कंबोडियांत आडकल्ल्या ह्या भारतीयांक तांचे इत्सेआड काम करपाक लायतात आनी सायबर फटवणूक करतात. सगळ्यांत चड धक्को दिवपी गजाल म्हळ्यार कंबोडियाचे लोक चडश्या भारतीयांकूच फटयतात.
भारतीयांक मुक्त करपाचे यत्न
भारत सरकाराच्या वेगवेगळ्या खात्यांतल्या अधिकार्यांची म्हत्वाची बसका जाली. हातूंत गृह मंत्रालय, परराश्ट्र मंत्रालय, इलॅक्ट्रॉनिक्स आनी म्हायती तंत्रज्ञान मंत्रालय, भारतीय सायबर गुन्यांव समन्वय केंद्र आनी हेर सुरक्षा संबंदीत अधिकार्यां मदीं जाल्ले बसकेंत कंबोडियांत अडकल्ल्या भारतीयां विशीं हुस्को उक्तायला. तशेंच कंबोडियांत अडकल्ल्या भारतीयांक सोडोवपा खातीर खंयची रणनिती तयार करूं येता? हे विशीं चर्चा जाली.
स म्हयन्यांत ५०० कोटी फटवणूक?
सुत्रांनी दिल्ले खबरेंत म्हणलां, वरीश्ठ अधिकार्यांचे जाल्ले हे बसकेचो अजेंडा म्हळ्यार हे बसके संबंदी चर्चा करप आनी थंय आडकल्ल्या लोकांक परत हाडप हो आशिल्लो. तशेंच फाटल्या स म्हयन्यांत कंबोडियांतल्यान सायबर फटवणुके वरवीं भारतांत ५०० कोटी रुपयांची फटवणूक जाल्ल्याचो दुबाव उक्तायला.
कशे फटयतात?
डेटा एन्ट्री सारक्या नोकरेच्या निमतान कांय एजंट लोकां वरवीं कंबोडियाक धाडटात अशें आतां मेरेन जाल्ल्या कांय गुन्यांवां वरवीं केंद्रीय यंत्रणांच्या तपासांत उक्तें जालां. उपरांत फटवणूक जाल्ल्या मनशाक सायबर फटवणूक करपाक ताचेर चेंपण घालता. हातूंत चडशे लोक दक्षिणेंतले आशिल्ल्याचो दुबाव उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
