ओपीडी फाल्यां बंद
भांगरभूंय | प्रतिनिधी
भारतीय वैजकी संघटणेचो (आयएमए) शेनवारा देशभर संप
पणजी : भारतीय वैजकी संघटणेचो (आयएमए) फाल्यां शेनवारा देशभर संप जावपाचो आसा. गोंयच्या फांट्यानूय ताका तेंको दिला. ताका लागून ’आयएमए’ कडेन जोडिल्ल्या राज्यांतल्या १,८०० खाजगी दोतोरांक आपत्कालीन सेवा सोडून शेनवारा सकाळीं ६ ते आयतार सकाळीं ६ वरां मेरेन ओपीडी सेवा बंद दवरपाचे निर्देश दिल्यात. तांतले सुमार १,२०० डॉक्टर ओपीडी २४ वरां बंद दवरपाची शक्यताय आसा. ’आयएमए’च्या गोंय फांट्याचे अध्यक्ष डॉ. संदेश चोडणकार हांणी हे विशीं परिपत्रक जारी केलां.
कांय दिसां फाटीं कोलकाताच्या आरजी कर मेडिकल कॉलेजींत बायल दोतोराचेर बलात्कार करून तिका मारून उडयिल्ली. ह्या प्रकरणाक लागून पुराय देशान तिडक उक्तायल्या. हे घडणुकेचो निशेध करपाक ’आयएमए’न १७ ऑगस्टाक देशव्यापी संपाचो उलो मारला. १,८०० तले कांय दोतोर सरकारी सेवेंत आसात. ताका लागून सुमार १,२०० डॉक्टर ओपीडी बंद दवरतले, अशी म्हायती डॉ. संदेश चोडणकार दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
