भांगरभूंय | प्रतिनिधी
फाटल्या २४ वरांनी ४५ जाणांक मरण आयिल्ल्यांची नोंद
भुवनेश्वर, खबरां संस्था: ओडिशा राज्यांत उश्णतायेची ल्हार आयल्या आनी उश्णतायेक लागून मरण येवपी नागरिकांचोय आंकडो वाडला. ताजे म्हायती प्रमाण, ओडिशांत उश्णतायेक लागून मरण आयिल्ल्यांचो आंकडो १४१ जाला. स्पेशल रिलीफ कमिशनरान दिल्ले म्हायतींत म्हणलां, फाटल्या २४ वरांनी सरकारान ४५ नव्या मरण आयिल्ल्यांची नोंद केल्या. शेनवारा (१ जून) मेरेन मरण आयिल्ल्यांचो आंकडो ९६ आसा. नागरिकांनी जतनाय घेवची आनी उश्णताये पसून स्वताची राखण करची अशी शिटकावणी प्रशासनान दिल्या. मजगतीं, हांगचें तापमान अजूनय चड आशिल्ल्यान हुस्को वाडला.
सुंदरगढ जिल्ह्यांत उश्णतायेचो चड परिणाम
स्पेशल रिलीफ कमिशनर (एसआरसी) हांणी जारी केल्ल्या निवेदनांतल्यान पोस्टमार्टम अहवालांत वट्ट मरणां मदल्या २६ जाणांक उश्णतायेक लागून मरण आयिल्ल्याची खात्री जाल्या. उरिल्ल्या १०७ प्रकरणांची चवकशी राज्य सरकार करता. ते भायर सरकारान आठ जाणांक मरण आयिल्ल्याचें कारण उश्णताये भायर हेर कारणां आसात अशें सांगलां. फाटल्या तीन दिसांत उश्णतायेक लागून ९९ जाणांक मरण आयलां. मुखेलपणान ओडिशाच्या अस्तंत भागांत आनीक लोकांक मरण आयिल्ल्याची म्हायती मेळ्ळ्या. हाचो सुंदरगढ जिल्ह्यांक सगळ्यांत चड परिणाम जाला. ह्या जिल्ह्यांत तीन दिसांत उश्णतायेक लागून दुबावीतपणान ३५ जाणांक मरण आयलां.
सुंदरगढचे अतिरिक्त जिल्लो दंडाधिकारी आशुतोष कुलकर्णी हांणी सांगलें, पोस्टमार्टम सुरू आसा. उश्णतायेक लागून स जाणांक मरण आयिल्ल्याची म्हायती मेळ्ळ्या.
बालंगीर जिल्ह्यांत २० जाणांक मरण
बालांगीर जिल्ह्यांत उश्णतायेक लागून दुबावीत २० जाणांक मरण आयिल्ल्याची म्हायती मेळ्ळ्या. उश्णतायेक लागून जाल्ल्या दुयेंसांतल्यान चार जाणांक मरण आयिल्ल्याची म्हायती मेळ्ळ्या. उरिल्ल्या प्रकरणांची चवकशी सुरू आसा अशी म्हायती अधिकृत सुत्रांनी दिल्या. संबलपूर जिल्ह्यांत १८ प्रकरणां नोंद जाल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
