भांगरभूंय | प्रतिनिधी
पेडणें: महाराष्ट्रांतल्या धांवडायिल्लो ओंकार हती मोपा वाठारांत परत आयलो. गोंयांत पावना फुडें तांणी शेतकारांक लुकसाण करपाक सुरवात केली. काजू बागायतींचें ताव मारिल्ल्यान शेतकारां खातीर तो चिंतेचो विशय थारला.
बर्याच दिसांनी ओंकार हती परत मोपा वाठारांत आयले उपरांत आतां राजकीय फुडार्यांची धांवपळ जातली. जया शेतकारांचें लुकसाण जालां तांची भेट आतां राजकी फुडारी घेतले. येवपी विधानसभा वेंचणुकेंत आपल्याकूय तुमचें फाटबळ जाय अशें म्हणीत मजतीचो हात मुखार करतले.
ओंकार हतयान फाटल्या दोन म्हयन्यां आदीं मोपा, तांबोसे, उगवें वाठारांत देंवून व्हडा प्रमाणांत शेती, बागायतीचो इबाड केलो. तेन्ना ह्या हतयाचो बंदोबस्त वेळार करचो अशी मागणी शेतकारांनी केल्ली. मात ताचो बंदबस्त जावंक़ ना. तांणी फाटल्या फावटीं भात, शेती, कवाथे, केळीं, सुपार्यो अश्या झाडांची व्हडा प्रमाणांत वाट लायिल्ली. तेन्ना वट्ट तीन लाखांची लुकसाण भरपाय सरकाराच्या माध्यमांतल्यान कृषी खात्यान पिडेस्त शेतकारांक लाव मेळोवन दिल्लो. आतांय ह्या हतयाचो बंदोबस्त बेगोबेग करपाची मागणी शेतकारांनी केल्या.
मोपा सरपंच सुबोध महाले हांणी, फाटले फावटीं व्हडा प्रमाणांत ह्या हतयान शेतकारांचें लुकसाण करचें. तेन्ना हतयाचो बंदोबस्त करचो म्हणून मागणी केल्ली. मात संबंदीत खात्यान हाचे कडेन आडनदर केल्ली. हे फावटीं तरी ओंकार हतयाक तज्ञानीं धरून ताका कर्नाटक वाठारांत धाडचें, अशी मागणी सरपंच सुबोध महाले हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
