भांगरभूंय | प्रतिनिधी
ऑस्ट्रेलियेच्या बॅट्समनां उपरांत बॉलरांनी जबरदस्त करतना पर्थ मैदानांत चालू आशिल्ले पयले टॅस्टींत वॅस्ट इंडीज पंगडाक बॅकफुटाचेर धुकल्लो.
संवसारांतल्या उत्कृश्ट बॉलरां मुखार वॅस्ट इंडिजाच्या बॅट्समनांनी दिमी मारली. ताचो पयलो डाव 283 धांवड्यांचेर सोंपलो, अशें तरेन ऑस्ट्रेलियेन पयल्या डावाच्या आदाराचेर 315 धांवड्यांची आघाडी घेतली. ताणें पयलो डाव 4 बाद 598चेर घोशीत केल्लो.
फास्ट बॉलर मिचेल स्टार्क आनी पॅट कमिन्स हांणी दरेकी तीन विकेटी घेतल्यो. ऑस्ट्रेलियेन वॅस्ट इंडिजाक फॉलोऑन दिवंक ना. तिसऱ्या दिसाचो खेळ सोंप मेरेन ऑस्ट्रेलिया पंगडान आपल्या दुसऱ्या डावांत 1 विकेट वगडावन 29 धांवड्यो केल्यात. अशे तरेन ताची वट्ट आघाडी 344चेर पावली.
डॅव्हीड वॉर्नर 17 आनी मार्नस लाबशेन तीन धांवड्यांचेर खेळटा. ऑस्ट्रेलियेन दुसऱ्या डावांत उस्मान ख्वाजाची विकेट वगडायली. ताणें स धांवड्यो केल्यो.
मजगतीं, वॅस्ट इंडिजाचो स्कोर च्या च्या विसवा उपरांत एका वेळार 4 बाद 245 आशिल्लो. पूण, दुसरो नवो बॉल घेतल्या उपरांत ऑस्ट्रेलियेन आपलो शेक दवरलो. बॉलरांनी सेगीत विकेटी घेवन विंडिजाचो डाव रोखडोच सोंपयलो. विंडिजान 48 धांवड्यां भितर स विकेटी वगडायल्यो.
ते पयलीं वॅस्ट इंडिजान सकाळीं आपलो डाव बिनबाद 74 धांवड्यां वयल्यान मुखार व्हेलो. जेवणाच्या विसवा मेरेन 1 विकेट वगडावन 150 धांवड्यो केल्ल्यो. ते उपरांत स्टार्क आनी कमिन्स हांणी ताचो डाव गडगडावन उडयलो. स्टार्कान 51 धांवड्यो दिवन 3 जाल्यार कमिन्सान 34 धांवड्यो दिवन तीन विकेटी घेतल्यो.
ऑफ स्पिनर नॅथन लायनान 61 धांवड्यो दिवन 2 विकेटी घेतल्यो. फास्ट बॉलर जोश हेजलवूड आनी कॅमरन ग्रीन हाणें दरेकी एक विकेट मेळयली. वॅस्ट इंडिजा वतीन मुखेली क्रॅग ब्रॅथवेटान 64 आनी आपली पयली मॅच खेळपी तेजनारायण चंद्रपॉलान 51 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
