भांगरभूंय | प्रतिनिधी
संवसारीक फुटबॉल सर्तींत काल डी गटांत जाल्ले मॅचींत ऑस्ट्रेलिया पंगडान ट्युनिशिया पंगडाक 1-0 अशा फरकान हारयलो. ह्या जैता सयत ऑस्ट्रेलिया पंगडान संवसारीक फुटबॉल सर्तींत फाटल्या 12 वर्सां सावन चालू आशिल्लो जैताचो दुकळ सोंपयलो.
अल वकराहच्या अल जनौब स्टेडियमाचेर जाल्ले मॅचींतलो एकोडो आनी म्हत्वाचो गोल मिचेल ड्युकान 23व्या मिनटाक केलो. पंगडाच्या वांगड्याच्या क्रॉसाचेर ड्युकान हेडरा वरवीं रायट कॉर्नरांत स्कोर केलो.
ह्या जैता सयत ऑस्ट्रेलिया डी गटांतल्या गुण तकट्यांत दुसरे सुवातेर पावलो. एक हार आनी एक जैता सयत ताचे तीन गूण जाल्यात. फ्रान्स पयले, डॅनमार्क तिसरे आनी ट्युनिशिया चवथे सुवातेर आसा.
ऑस्ट्रेलियान अंदूंचे सर्तींत केल्लो हो दुसरो गोल थारलो. फ्रान्सा आड ताच्या क्रॅग गुडविनान गोल केल्लो. फ्रान्सा आडचे ते मॅचींत ऑस्ट्रेलिया पंगडाक 1-4 फरकान हार घेवची पडिल्ली.
मजगतीं, ट्युनिशियाक गोल करपाची भांगराळी संद मेळिल्ली. पूण, ताचो मुखेली योसेफ सकनीन शूट ऑस्ट्रेलियेच्या गोलपोस्टाच्या भायर मारली.
ऑस्ट्रेलियान 12 वर्सांनी संवसारीक सर्तींत जैत जोडलें. निमाणें जैत 2010त सर्बियाक हारयिल्लो. ते उपरांत ऑस्ट्रेलिया पंगडा सात मॅची खेळ्ळो. पूण, ताका एक लेगीत जैत फावो जावंक नाशिल्लें. ऑस्ट्रेलिया आपली डी गटांतली निमाणी मॅच 30 नोव्हेंबराक डॅनमार्का आड खेळटलो.
पयल्या अर्दांत गोल घेतल्या उपरांत ट्युनिशियान उरिल्ल्या खेळाच्या वेळांत ऑस्ट्रेलियेचेर चेपण दवरिल्लें. ट्युनिशियान आक्रमक बॅटींग करपाची रणनिती आपणायिल्ली. ताणें 14 शॉर्ट मारले, तातूंतले 4 ऑन टार्गेट आशिल्ले. पूण, ताका गोल करपाक जमलो ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
