भांगरभूंय | प्रतिनिधी
पॅट कमिन्स (5 विकेटी) आनी मिचेल स्टार्क (4 विकेटी) हांचे घातक बॉलिंगे नेटार ऑस्ट्रेलिया पंगडान पाकिस्तानाक 79 धांवड्यांनी हारोवन तीन टॅस्टींचे माळेंत 2-0 अशी निर्णायक आघाडी घेतली.
ऑस्ट्रेलियेन पयल्या डावांत 318 धांवड्यो केल्ल्यो. जाल्यार पाकिस्तानाचो पयलो डाव 264 धांवड्यांचेर सोंपिल्लो. अशे तरेन ऑस्ट्रेलियेक पयल्या डावाच्या आदाराचेर 54 धांवड्यांची आघाडी मेळिल्ली. ऑस्ट्रेलियेचो दुसरो डाव 262चेर सोंपिल्लो. अशे तरेन पाकिस्तानाक जैता खातीर 317 धांवड्यांची मोख मेळिल्ली. पूण ताका 237 मेरेन मजल मारप शक्य जालें.
मोखीचो फाटलाव करपी पाकिस्तानाची सुरवात बाबत जाली. ओपनर अब्दुल्ला शफीक चार आनी इमाम उल हक 12 धांवड्यो करून तंबूंत परतलो. ते उपरांत मुखेली शान मसूदान बाबर आजमा वांगडा मेळून तिसरे विकेटी खातीर 61 धांवड्यांची भागिदारी केली. मसूदान 71 बॉलांनी सात चवक्यांचे मजतीन 60 धांवड्यांची खेळी केली. ताका कमिन्सान बाद केलो.
बाबर आजमान 79 बॉलांनी चार चवक्यांचे मजतीन 41 धांवड्यो केल्यो. ताका हेजलवुडान बोल्ड केलो. सौद शकिलान 25, मोहम्मद रिजवानान 35 आनी आगा सलमानान 50 धांवड्यांचें योगदान दिलें. पाकिस्तानाचो डाव 67.2 ओव्हरींनी सोंपलो. कमिन्सान मॅचींत 10 विकेटी घेतल्यो.
ते पयलीं ऑस्ट्रेलियेच्या दुसऱ्या डावाची सुरवात लेगीत बाबत जाल्ली. एका वेळार ताणें 16 धांवड्यांचेर चार विकेटी वगडायिल्ल्यो. उस्मान ख्वाजा आनी ट्रॅव्हिस हेड शुन्याचेर बाद जाले. डॅव्हिड वॉर्नर स आनी मार्नस लाबुशेन चार धांवड्यो करून तंबूंत गेल्लो.
ते उपरांत स्टिव स्मिथ आनी मिचेल मार्श हाणें डाव सांबाळटना पांचवे विकेटी खातीर 153 धांवड्यांची भागिदारी केली. मार्शान टॅस्ट कारकिर्दींतलो सातवो अर्द शेंकडो नोंदयलो. तो 130 बॉलांनी 13 चवक्यांचे मजतीन 96 धांवड्यांचेर बाद जालो. स्मिथ 176 बॉलांनी 50 धांवड्यो करून बाद जालो. ताणें तीन चवके मारले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
