भांगरभूंय | प्रतिनिधी
वानखेडे स्टेडियमाचेर चालू आशिल्ले टॅस्टीच्या तिसऱ्या दिसा ऑस्ट्रेलियेच्या बायलांच्या पंगडान दुसऱ्या डावाची सुरवात केली आनी खेळ सोंप मेरेन 46 धांवड्यांची आघाडी घेतली. ताणें 5 विकेटी वगडावन 233 धांवड्यो केल्यात.
एनाबेल सदरलॅण्ड 12 आनी अॅश्ले गार्डनर 7 धांवड्यो करून खेळपट्टीचेर आसा. भारता वतीन दीप्ति शर्मा आनी हरमनप्रीत कौर हिणें दरेकी दोन विकेटी घेतल्यो.
ते पयलीं भारतान 7 बाद 376 धांवड्यां वयल्यान मुखार खेळपाक सुरवात केली आनी उरिल्ल्या बॅटरांनी 30 धांवड्यांची भर घालून स्कोर 406चेर पावयलो. दीप्ति शर्मान 78 आनी पुजा वस्त्रकरान 47 धांवड्यांची खेळी केली.
ऑस्ट्रेलिये वतीन अॅश्ले गार्डनरान 4 विकेटी घेतल्यो. जाल्यार एनाबेल सदरलॅण्ड आनी किम गार्थ हिणें दरेकी 2 विकेटी मेळयल्यो. स्पिनर जेस जॉनासनान एक विकेट मेळयली.
ऑस्ट्रेलियेच्या दुसऱ्या डावाक बरी सुरवात जाली ना. ओपनर बेथ मुनी 33 आनी फोब चिलफिल्ड 18 धांवड्यो करून तंबूंत परतलीं. तिसरे सुवातेर खेळपाक आयिल्ले एलिस पेरीन डाव सांबाळ्ळो. ताहकिया मॅकग्रा वांगडा मेळून तिणें 84 धांवड्यांची भागिदारी केली. ही जोडी स्नेह राणान फोडली. तिणें एलिस हिका 45 धांवड्यांचेर बाद केली.
हे विकेटी उपरांत मुखेली एलिस हिली आनी मॅकग्रा हे जोडयेन अर्द शेंकड्याची भागिदारी केली. ताहलियान 73 धांवड्यांची खेळी केली. हिली 32 धांवड्यो करून बाद जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
