भांगरभूंय | प्रतिनिधी
भारत आनी ऑस्ट्रेलिया ह्या पंगडां मदीं चालू आशिल्ले बॉर्डर-गावस्कर ट्रॉफीचे चवथे मॅचींत खेळपट्टीचो मूड बदलना फुडें बॅटान आपलो रंग दाखोवपाक सुरवात केली. त्याच वेळार बॉलाचो परिणाम फिको पडलो.
पयल्या दिसा ऑस्ट्रेलियेन पयल्या डावांत 4 विकेटी वगडावन 255 धांवड्यो केल्यात.
ओपनर उस्मान ख्वाजान (104 नाबाद) 14वो टॅस्ट शेंकडो नोंदयलो. कॅमरुन ग्रीन 49चेर खेळटा.
अहमदाबादाच्या नरेंद्र मोदी स्टेडियमाचेर टॉस जिखून पयलीं बॅटींग करपाचो निर्णय घेवपी ऑस्ट्रेलिये वतीन पिटर हॅण्ड्सकॉम्बान 17, स्टिवन स्मिथान 38, मार्नस लाबशेनान 3 आनी ट्रॅव्हिस हेडान 32 धांवड्यो केल्यो.
भारता वतीन मोहम्मद शमीन दोन, रवींद्र जडेजा आनी आर आश्विन हाणें दरेकी एक विकेट घेतली.
ऑस्ट्रेलियेक बरी सुरवात करून दिवपाक टॉप-मिडलांतल्या भागिदाऱ्यांनी म्हत्वाचें योगदान दिलें. ख्वाजा खेरीत ताच्या एकाय बॅट्समनाक व्हड खेळी करपाक जमली ना. पूण, ख्वाजान तीन अर्द शेंकड्यांच्यो भागिदाऱ्यो केल्यो. पयलीं ताणें ओपनर ट्रॅव्हिस हेडा (32) वांगडा 61 धांवड्यांची, स्टिवन स्मिथा (38) वांगडा 79 आनी कॅमरुन ग्रीन (खेळटा 49) हाच्या वांगडा अजून मेरेन नाबाद 85 धांवड्यांची भागिदारी केल्या.
मजगतीं, पाचवेचार खेळपट्टीटेर उमेश यादव आनी मोहम्मद शमी हांकां बरे तरेन स्विंग मेळटालो. पूण, लायन आनी लॅंथ हातूंत गडबड जाल्ल्यान सुरवातीक विकेटी मेळूंक ना.
जेवणाच्या विसवाच्या पयलीच्या 14 ओव्हरींनी ऑस्ट्रेलियेन बिनबाद 56 धांवड्यो केल्ल्यो. ते उपरांतच्या 14 ओव्हरींनी भारताच्या बॉलरांनी आपलो शेक दवरलो. फकत 19 धांवड्यो दिवन 2 विकेटी घेतल्यो.
मजगतीं, माळेंत दोन अर्द शेंकडे मारपी ख्वाजान भारतांत पयलो शेंकडो नोंदयलो. ताणें 251 बॉलांनी 15 चवक्यांचे मजतीन नाबाद 104 धांवड्यो केल्यो. फाटल्या 12 वर्सांनी भारतांत शेंकडो मारपी ख्वाजा ऑस्ट्रेलियेचो पयलो दावखुरो बॅट्समन थारलो.
भारताक बरी सुरवात मेळपाची पूण, विकेटकीपर श्रीकर भरतान दोनदा कॅची सोडल्यो. दोनूय कॅच ट्रव्हिस हेडाच्योच आशिल्ल्यो. दोन जीवनदानांचो फायदो घेतना हेडान आक्रमक खेळी केली. अखेरेक आर आश्विनान ताका वैयक्तीक 32 धांवड्यांचेर बाद केलो.
जेवणाच्या विसवा पयलीं शमीन मार्नस लाबशेनाक बाद करून भारताक मॅचींत हाडपाचो यत्न केलो. जेवणाच्या विसवा उपरांत ख्वाजा आनी स्मिथ हांणी संयमान बॅटींग केली. मजगतीं, ख्वाजान 49वे ओव्हरींत आपलो अर्द शेंकडो पुर्ण केलो. भारतान विकेट घेवपाचो खूब यत्न केलो. पूण, ताका येस मेळूंक ना. ख्वाजा-स्मिथ हांकां लागून च्याच्या विसवा मेरेन एकूय विकडायनासतना ऑस्ट्रेलियेन 149 धांवड्यो केल्यो. अखेरेक रवींद्र जडेजान ही जोडी फोडली. ताणें स्मिथाक बोल्ड केलो.
स्मिथ बाद जाल्या उपरांत शमीन हॅण्ड्सकॉम्बाक बाद केलो. ते उपरांत ख्वाजा आनी ग्रीन हे जोडयेन जम बसयलो आनी भारताक आनीक विकेट दिवंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
