भांगरभूंय | प्रतिनिधी
मॅलबॉर्न क्रिकेट मैदानाचेर सुरू जाल्ले बॉक्सिंग डे टॅस्टीच्या पयल्या दिसाचो खेळ सोंप मेरेन येजमान ऑस्ट्रेलिया पंगडान 3 विकेटी वगडावन 187 धांवड्यो केल्यात.
पावसाक लागून तीन टॅस्टींचे माळेंतली दुसरी मॅच उसरां सुरू जाली. पयल्या दिसा फकत 66 ओव्हरींचो खेळ जालो. मार्नस लाबुशेन 44 आनी ट्रॅव्हिस हेड 9 धांवड्यो करून खेळपट्टीचेर आसा.
पाकिस्तानाचो मुखेली मसूदान टॉस जिखून पयलीं फिल्डिंग करपाचो निर्णय घेतलो. डॅव्हिड वॉर्नर आनी उस्मान ख्वाजा हाणें ऑस्ट्रेलियेक बरी सुरवात करून दिली. पयले विकेटी खातीर वॉर्नर आनी ख्वाजा हाणें 163 बॉलांनी 90 धांवड्यांची भागिदारी केली. वॉर्नर अखेरेक सलमान अली आगाचे बॉलिंगेचेर बाबर आजमाक कॅच दिवन तंबूंत परतलो. ताणें 83 बॉलांनी 38 धांवड्यो केल्यो. ख्वाजान 101 बॉलांनी पांच चवक्यांचे मजतीन 42 धांवड्यांची खेळी केली. ख्वाजाक हसन अलीन बाद केलो. स्टिव स्मिथ 75 बॉलांनी 26 धांवड्यो करून आमिर जमालाचो शिकार थारलो.
वॉर्नर 38 धांवड्यो करिना फुडें आंतरराष्ट्रीय क्रिकेटींत ऑस्ट्रेलिये वतीन सगल्यांत चड धांवड्यो करपी दुसरो बॅट्समन थारलो. ताणें स्टिव वॉ हाका फाटीं घालो. स्टिव वॉन आंतरराष्ट्रीय क्रिकेटींत 18,496 धांवड्यो केल्ल्यो. वॉर्नर ताच्या परस मुखार गेलो. वॉर्नरान तिनूय प्रकारांनी मेळून 18,502 धांवड्यो केल्यात. पयले सुवातेर रिकी पॉण्टिंग आसा. पॉण्टिंगान आंतरराष्ट्रीय क्रिकेटींत वट्ट 27, 368 धांवड्यो केल्यात.
तीन टॅस्टींचे माळेंत ऑस्ट्रेलिया 1-0 असो मुखार आसा. पयली मॅच 360 धांवड्यांनी जिखिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
