भांगरभूंय | प्रतिनिधी
दोन हारीन संवसारीक वन डे क्रिकेट सर्तीक सुरवात करपी ऑस्ट्रेलिया पंगडान अजापीत करपी प्रदर्शन करून थेट फायनलींत सुवात मेळयली. ताणें आफ्रिका पंगडाक 3 विकेटींनी हारयलो.
212 धांवड्यांची राखण करपा खातीर दक्षीण आफ्रिका पंगडान खर यत्न केले. पूण, ऑस्ट्रेलियेचे चिकाटी मुखार तो अपेशी थारलो. ट्रॅव्हिस हेड आनी डॅव्हिड वॉर्नर हांच्या आक्रमक सुरवाती उपरांत आफ्रिकेच्या स्पिनरांनी मॅचींत रंग हाडिल्लो. पूण, चोकर्स हो बशिल्लो ठपको परतून सिद्ध जालो. ऑस्ट्रेलिया पंगडान आठवे खेपे फायनलींत सुवात मेळयली. 19 नोव्हेंबराक नरेंद्र मोदी स्टेडियमाचेर भारत आनी ऑस्ट्रेलिया ह्या पंगडां मदीं फायनल जातली.
वॉर्नर आनी हेड ह्या दोगांयनी 38 बॉलांनी 60 धांवड्यो केल्यो. पूण, एडेन मार्करमान आपले पयलेच ओव्हरींत वॉर्नराक (29) बोल्ड केलो. कगिसो रबाडाचे ओव्हरींत मिचेल मार्शाची (0) रॅसी व्हॅन डेर ड्युसेनान उत्कृश्ट कॅच धरली. ते उपरांत स्पिनरांनी आपलो मारो सुरू केलो. तब्रेझ शम्सीचे पयलेच ओव्हरींत स्टिव्ह स्मिथ आनी हेड हांकां जीवनदान मेळ्ळें. कॅची मात्श्यो कठीण आशिल्ल्यो. पूण, त्यो धरप शक्य आशिल्ल्यो. केशव महाराजान आपले पयलेच ओव्हरींत हेडाक (62) बोल्ड केलो. स्मिथ आनी मार्नस लाबशेन हांकां डाव सांबाळपाक अपेस आयलें. शम्सीन 22वे ओव्हरींत लाबशेनाची (18) विकेट मेळयली. शम्सीन म्हत्वाचो बॅट्समन ग्लॅन मॅक्सवॅलाक (1) बोल्ड केल्ल्यान ऑस्ट्रेलियेचो अर्द पंगड 137 तंबूंत परतून गेल्लो.
स्मिथ आनी जोश इंग्लीश हाणें संयमी खेळ चालूच दवरलो. ऑस्ट्रेलियेक जैता खातीर 39 धांवड्यांची गरज आसतना गेराल्ड कोएत्झीन व्हड धपको दिलो. ताणें स्मिथाक बाद केलो. स्मिथान 62 बॉलांनी 30 धांवड्यो केल्यो. बाद जावचे पयलीं इंग्लीशा वांगडा ताणें 37 धांवड्यांची भागिदारी केल्ली. 20 धांवड्यांची गरज आसतना कोएत्झीन 49 बॉलांनी 28 धांवड्यो करपी इंग्लिशाक बोल्ड केलो. क्विंटन डी कॉका कडल्यान पॅट कमिन्साची कॅच सुटली आनी मॅचीक वळण येता येता उरलें. मिचेल स्टार्क (16) आनी कमिन्स (14) हाणें संयमी खेळ (46 बॉलांनी 22 धांवड्यो) करून मॅच सोंपयली. 2007 आनी 2015 उपरांत आफ्रिका परतून सेमी फायनलींत हारलो. ऑस्ट्रेलियेन 47.2 ओव्हरींनी 7 विकेटी वगडावन 215 धांवड्यो केल्यो.
ते पयलीं मिचेल स्टार्क आनी जोश हेझलवूड हांणी सुरवातीचे ओव्हरींनी दरेकी दोन विकेटी घेवन आफ्रिकेची अवस्था 4 बाद 24 अशी बाबत केली. डॅव्हिड मिलर आनी हॅन्रिच क्लासेन (48) हे जोडयेन 95 धांवड्यांची भागिदारी केली. ट्रॅव्हिस हेडान क्लासेनाक बोल्ड केलो आनी फाटोफाट मार्को यान्सेनाक (0) लेगीत तंबूंत धाडलो. मिलर आनी गेराल्ड कोएत्झी (19) हांची 53 धांवड्यांची भागिदारी कमिन्सान फोडली. अखेरच्या ओव्हरींनी धांवड्यांची गती वाडोवपाच्या यत्नांत मिलर 101 धांवड्यांचेर बाद जालो. ताणें 116 बॉलांनी आठ चवके आनी पांच सके मारले. आफ्रिकेचो डाव 49.4 ओव्हरींनी 212चेर सोंपलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
