भांगरभूंय | प्रतिनिधी
खबरां संस्था
पुणेः संवसारीक संघटनेन बंदी घातिल्ल्या भारतीय कुस्ती म्हासंघाचें कामकाज पळोवपी हंगामी समितीन अजापाचे निर्णय घेवपाची प्रथा तशीच दवोरल्या. 2024च्या पॅरीस ऑलिम्पिकाचो कोटा मेळोवपी कुस्तीगिरांक हे सर्ती खातीर थेट भारतीय पंगडांत सुवात मेळची ना. तांकांय पात्रताय सिद्ध करपा खातीर निवड चांचणीत खेळप अनवार्य करपाचो निर्णय हे समितीन घेतला.
ही हंगामी समिती सुरवेक कुस्तीगिरांची निवड करतली. उपरांत तांचे कडेन ऑलिम्पीक कोटा मेळयल्ले मल्ल 1 जूनाक खेळटले. तातूंत जैतिवंत थारपी मल्ल ऑलिम्पिका खातीर वतले. आतां मेरेन ऑलिम्पीक कोटा मेळोवन दिवपी मल्लच ऑलिम्पिकांत खेळटाले. हंगामी समिती आता हुकूमशायेन वागता अशी चर्चा कुस्ती मळार सुरू आसा
विशेश म्हणल्यार आतां मेरेन भारताक फखत बायल कुस्तीगिरांनी 53 किलो गटात ऑलिम्पीक कोटा मेळोवन दिला. अजून 17 मल्लांक पात्रताय सिद्ध करपाची आसा. तांका आशियाई ऑलिम्पीक पात्रता 19 तें 21 एप्रील 2024 हे मजगतीं किर्गिस्तान, जाल्यार संवसारीक ऑलिम्पीक पात्रताय 9 तें 12 मे 2024 मजगती तुर्की हांगा जावपी सर्तींत सिद्ध करची पडटली. पात्रताय फेरी जाल्या उपरांत देशाक ऑलिम्पीक कोटा मेळोवन दिवपी मल्लांचे आव्हानवीर हंगामी समिती 31 मेक जाहीर करतली आनी 2 जूनाक तांची लडत जातली.
.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.