भांगरभूंय | प्रतिनिधी
न्हंय येरादारी खात्याचें १७ वर्सां, इमॅजीन पणजी स्मार्ट सिटीचें पांच वर्सांचें ऑडीट जावंक ना
पणजी, प्रतिनिधी : विवीध सरकारी खातीं, महामंडळां तशेंच स्वायत्त संस्थांच्या कामांत पारदर्शकता येवपाक तांचें दर वर्सा ऑडीट करप गरजेचें. मात राज्यांतलीं ८ महामंडळां, २ स्वायत्त संस्था आनी एका खात्यान ऑडीट करूंक ना हें स्पश्ट जालां. ८ एप्रिलाच्या निमाणे कडेनूय विवीध खातीं, स्वायत्त संस्था आनी महामंडळांचें बर्याच वर्सांचें ऑडीट आडकून आसा. हे ऑडीट बेगीन करपाचे निर्देश लेखा खात्यान दिल्या.
न्हंय येरादारी खात्याचे २००६-०७ ते २०२२-२३ अशें सगळ्यांत चड १७ वर्सांचें ऑडीट उरलां. इमॅजीन पणजी स्मार्ट सिटीचें २०१८-१९ ते २०२२-२३ ह्या पांच वर्सांचें ऑडीट जावंक ना. एससी, एसटी विकास महामंडळाचें २०१२-१३ ते २०२२-२३ अशें ११ वर्सांचें ऑडीट जावंक ना. इन्फो टेक महामंडळाचें २०१५-१६ ते २०२२-२३ अशें ८ वर्सांचें, वन खात्या खाला येवपी ’कांपा’चें २०१७-१८ ते २०२२-२३ अशें ६ वर्सांचें ऑडीट जावंक ना, अशी म्हायती मेळ्ळ्या.
तशेंच अल्प संख्यांक विकास महामंडळाचे २०१९-२० ते २०२२-२३ अशें ४ वर्सांचें ऑडीट उरलां. जाल्यार वन विकास महामंडळाचें २ वर्सांचें ऑडीट जावंक ना. फळ उत्पादन मंडळ आनी इन्फो टेक विकास मंडळाचें २ वर्सांचें ऑडीट जावंक ना. गोंय उद्देगीक विकास महामंडळ ( आयडीसी ) आनी खादी आनी ग्रामोद्देग मंडळाचें एका वर्साचें ऑडीट जावपाचें उरलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.