भांगरभूंय | प्रतिनिधी
पेडणे येरादारी विभागाक लागून बशी आतां स्टॅण्डार येतात
पेडणें, प्रतिनिधी: सिंधुदुर्ग जिल्ह्यांतल्यान येवपी महाराष्ट्र परिवहन येरादारी विभागाच्यो बसी पेडणें बस स्टॅण्डार येवपाचें सोडून सरळ म्हापश्यां- पणजे वतात. पेडणें बस स्टॅण्डाचेर स्टाॅप घेवचो असो आदेश आसून लेगीत बस ड्रायव्हर आनी कंडक्टर स्टॅण्डाचेर बसी हाडिनात. हें कळ्ळ्या उपरांत पेडणें येरादारी विभागाच्या सहकार्यान नागरिकांनी महामार्गाचेर उबे रावन संबंदीत बसींक पेडणें बस स्टॅण्डाचेर येवपाक सांगलें.
पेडणेंचे नागरीक जगन्नाथ पंडित हांणी फाटल्या कांय म्हयन्यां सावन महाराष्ट्र परिवाहन विभागा कडेन पत्र वेव्हार करून पेडणें बस स्टॅण्डाचेर बसी हाडपाची मागणी केल्ली. परिवहन खात्यान आदेश दिवन लेगीत ड्रायव्हर बसी हाडीनात, अशें दिसून आयलें. उपरांत नागरिकांनी पेडणें येरादारी विभागाची भेट घेवन लेखी निवेदन सादर केलें. पेडणें येरादारी विभागान तातूंत लक्ष घालून न्हंयबाग जंगशनाचेर येरादारी पुलिसांची नेमणूक केली आनी येवपी बसींची देखरेख करपाक सुरवात केली. ह्या वेळार पेडणेंच्या नागरिकांनी तांकां सहकार्य केलें.
येरादारी विभागाच्या ह्या उपक्रमाक लागून पेडणें बस स्टॅण्डाचेर बसी येवपाक सुरवात जाल्या. येरादारी विभागाचे पुलीस प्रेमनाथ सावळ देसाय हांणी नागरिकांक सहकार्य केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
