भांगरभूंय | प्रतिनिधी
गिमाच्या दिसांनी घरांत एसीचो वापर वाडटा. वाडपी उश्णतायेक लागून आमकां २४ वरां एसी वापरची पडटा. हाका लागून लायटीचीं बिलांय वाडटात. मागीर लोक भायर कितलेंय गरम आसलें तरी एसी वापरपाक भियेतात. एसी कितलीय वापरल्यार लायटीचें बिल कशें वाडचें ना हे विशीं आयज आमी तुमकां सांगतलीं.
ह्यो एसी वापरपाच्यो टिप्स फॉलो करात
१. एसी चड वापरल्यार वाडत वचपी लायटीचें बील उणें करपाक कांय म्हत्वाच्यो गजाली पाळच्यो. एसी सारकी कूल करपा खातीर तापमान एका खाशेल्या क्रमांकाचेर थारायतात. जायत्या जाणांक एसी बेगीन थंड जावपाक जाय म्हणून तापमान १८ ते २० करपाची संवय आसता. जें सैमीक रितीन लायटीचें बिल वाडयता. तुमीय अशें करता जाल्यार लायटीचें बील चड येवचें न्हय म्हणून एसी तापमान २५ करात. हाचो लायट बिलाचेर परिणाम जायना.
२. गरमेंत एसी बरी थंड जायना अशी कागाळ आसल्यार एसी लायिल्ले कुडींत कितलें सामान आसा? हाचेर लक्ष दिवचें. कुडींत जितल्यो उण्यो वस्तू वा फर्निचर आसता तितलेच बेगीत ती कूड थंड जातली हे लक्षांत दवरात. देखून एसी बसयल्ले कुडींत उण्यो वस्तू दवरात.
३. एसी वापरतना आनीक एक म्हत्वाची गजाल म्हळ्यार एसी बसयल्ले कुडीचीं जनेलां आनी दारां बंद दवरचीं. एसी आशिल्ले कुडी भितर वत येवचें न्हय हाची जतनाय घेवची. कारण, अशें आसल्यार एसी थंड जावपाक चड कळाव लागतात. हाचो तुमच्या वीज बिलाचेर परिणाम जावं येता. ते खातीर तुमच्या जनेलां-दारांतल्यान वत भितर सरचें न्हय आनी कूड तापची न्हय हाची जतनाय घेयात.
४. एसी बेगीन थंड करपाक जाय जाल्यार, ताचें तापमान १६ वा २८ दवरचे परस कुडींतलो फॅन चालू दवरात. फॅन चालू आसल्यार एसीची थंड हवा कुडींत भोंवतली आनी तुमची कूड बेगीन थंड जातली. ताका लागून एसी चड वेळ चलोवचो पडचो ना. हाचे भायर वीज बिलूय उणें जातलें.
५. एसीचें नेमान सर्विसींग करचें. एसीची वेळार सर्विसींग जायना जाल्यार ताची काम करपाची तांक उणी जाता. ताका लागून एसी इबाडटा.
६. तुमचो एसी बरोच वेळ चल्ल्या उपरांत लेगीत थंडसाण दिना जाल्यार एसींतल्यान गळती जाता काय? हाची खात्री करून घेयात. अशें आसल्यार एसी योग्य थंडाय दिवची ना. तशेंच तुमचें बिल नेटान वाडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
