भांगरभूंय | प्रतिनिधी
वाडत वचपी उश्णताय आनी सेगीत घाम आयिल्ल्यान जायत्या घरांनी एअर कंडिशनर (एसी) ही गरज जावन पडल्या. पूण एसीच्या दिसपट्ट्या वापराक लागून घरांतलीं भुरगीं चड करून दुयेंत पडटात असो गैरसमज पालकां मदीं आसा. हे संबंदीं तज्ञांचें मत जाणून घेतले उपरांत कांय म्हत्वाचे प्रस्न उजवाडाक आयल्यात. हे विशीं डॉ. संजय नगरकर, इंटरनल मेडिसिन एक्सपर्ट, अपोलो स्पेक्ट्रा हॉस्पिटल पुणे हांणी पालकांक दिल्यो म्हत्वाच्यो शिटकावण्यो.
दोतोरांच्या म्हणण्या प्रमाण एसी स्वता रोग निर्माण करिना. पूण एसीचो अयोग्य वापर केल्ल्यान भुरग्यांचे भलायकेचेर वायट परिणाम जावंक शकतात. खासा करून एसीचें तापमान चड उणें दवरप, वेळावेळार एसी फिल्टर निवळ करप ना वा कुडींत योग्य हवामान नासप हांकां लागूनय जायते त्रास जावंक शकतात. एसींच्या थंड हवेक लागून कांय भुरग्यांक थंडी, खोंकली, गळो दुखप वा कांत सुकी जावं येता. हाचें मुखेल कारण म्हळ्यार वातावरणांत अचकीत जावपी बदल. भायर उजो ओंकपी र्सु आनी घरात सुरु आशिल्ले एसीक लागून सामकें थंड जाल्लें वातावरण बदला कडेन जुळून घेवप कठीण वता. तातूंत ल्हान भुरग्यांची प्रतिकारशक्ती मुळांत उणी आशिल्ल्यान ताचो त्रास जावपाक शकता.
एसी वापरतना २४ – २६ अंश सेल्सियस तापमान योग्य मानतात अशें डॉ.संजय नगरकार सांगतात. तशेंच दर २ ते ३ सप्तकांनी एसी फिल्टर निवळ करप गरजेचें आसता कारण अशें घाण फिल्टर हवेंत धुल्ल, जंतू आनी एलर्जी पातळपाक शकतात, जाका लागून भुरग्यांक एलर्जी वा स्वास घेवपाची समस्या जावपाची शक्यताय वाडटा.
हाचे भायर एसी चालू आसतना नेमान जनेलां उगडून ताजे हवेक भितर सोडप लेगीत गरजेचें आसता. भुरग्यांक फावो तें उदक दिवप, एसी चालू आसल्यार पुराय आंगाक व्यापून दवरपी कपडे घालप आनी एसीचें वारें सरळ तांच्या आंगाचेर येवचें न्हय हाची खात्री करप म्हत्वाचें. भुरग्यांक न्हिदेंत पातळ कापसाची चादर वा कांबळ घातल्या हाची खा णी करून घेयात. हाका लागून तांच्या आंगात थंडसाण ओडची ना. एसींत न्हिदिल्ल्या भुरग्यांच्या आंगांत उदकाचें प्रमाण उणें जावपाक शकता. देखून, तांकां वेळोवेळ दूद वा उदक दिवचें.
एकूणच एसीचो सारको आनी मर्यादीत प्रमाणांत वापर केल्यार भुरग्यांक ताचो गंभीर धोको निर्माण जावचो ना. उरफाटें तांकां उश्णताये पासून राखण मेळटली आनी तुमच्या घरांत सोयीचें आनी थंड वातावरण तयार जातलें. देखून पालकांनी भिये नासतना फावो ते जतनायेन एसी वापरचो अशें तज्ञांचें मत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
