भांगरभूंय | प्रतिनिधी
भांगरभूंय । खेळां मेज
पणजीः स्रोर्टींग क्लब दी गोवाक आयताराक बेंगळुरू फुटबॉल स्टेडियमार जाल्ल्या सेकंड डिव्हिजन आयलीग फुटबॉल सर्तींत स्पोर्टींग क्लब बेंगळुरू कडल्यान श्रवण शेट्टी हाणे केल्ल्या एकसुऱ्या गोलान हार खावची पडली. श्रवणान पयल्या हाफांत हो निर्णायक गोल केलो. दुसऱ्या हाफांत गोवा स्पोर्टींगाक बोरोबोरी करपाची संद मेळिल्ली पूण बदली खेळगडो मार्क कार्व्हालो पेनल्टीचेर गोल करपाक अपेशी थारलो.
हे मॅची उपरांत गोवा स्पोर्टींगाचे 7 मॅचींतल्यान 10 गुण जाल्यात आनी तो तिसरेच सुवातेर आसा. एससी बेंगळुरू 15 गुणांनी दुसऱ्या जाल्यार बेंगळुरू युनायटेड 16 गुणांनी पयले सुवातेर आसा. गोवाचो मुख्य प्रशिक्षक आर्मांदो कुलासोन सुरवेच्या ईकरांत दोन बदल केले. भारताचो आदलो खेळगडो आदिल खानाक ह्या सिझनांत पयलेच फावट मीडफिल्डांत खेळपाक धाडलें. खेळाच्या सुरवेकूच इव्हॉन कॉस्तान लांब अंतरा वयल्यान दाव्या पायान मारिल्लो नेटाचो फटको गोलपोस्टा वयल्यान गेलो. ह्या उपरांत 28 व्या मिनचाक श्रवण शेट्टीन गोल करून बेंगळुरूचो गोल केलो आनी ही आघाडी तांणी निमाणे मेरेन तिगोवन दवोरली. जॉयनर लॉरेन्सो आनी क्लुझनर परेरा हांणी बॉलाचेर ताबो मेळयले उपरांत सय्यद उमेर हाणे श्रवण शेट्टीक आडावपाचो यत्न केलो. मात ताणे गोलकी आंतोदियो डिसिल्वाक फटोवन गोल केलो.
दुसऱ्या हाफांत स्पोर्टींगान आपल्या पंगडांत दोन बदल केले. मार्क कर्व्हालो आनी शेल्टन निक्सनाक खेळपाक हाडलें. बेंगळुरूचो गोलकी नीरज कुमारान बिस्वा दार्जीक बॉक्सांत सकल उडयल्ल्यान स्पोर्टींगाक रेफ्रीन पेनल्टी दिली मात मार्काक गोल करपाची ही बरी संद फळादीक करपाक जमलें ना. स्पोर्टिंगाची फुडली मॅच 30 मार्चाक सुदेवा दिल्ली एफसी पंगडा वांगडा जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
