भांगरभूंय | प्रतिनिधी
‘राज्यांतल्या शाळेच्या शिक्षणांत बदल’ विशयाचेर तज्ञ करतले मार्गदर्शन
पणजी ः राज्य शिक्षणीक संशोधन आनी प्रशिक्षण परिशद (एससीईआरटी) वतीन 5 आनी 6 डिसेंबराक राष्ट्रीय पांवड्यार परिसंवाद घडोवन हाडला. नवो राज्य अभ्यासक्रम आराखडो वरवीं ‘राज्यांतल्या शाळेच्या शिक्षणांत बदल’ ह्या विशयाचेर तज्ञ मार्गदर्शन करतले.
एससीईआरटीची संचालक मेघना शेटगांवकार हांणी ही म्हायती दिली. सोमारा जाल्ले पत्रकार परिशदेंत ती उलयताली. ह्या वेळार शिक्षण संचालक शैलेश झिंगडे, सरीता मराठे, गोविंदराज देसाय आनी रुपेश सावंत हाजीर आशिल्ले.
ह्या परिसंवादांत राष्ट्रीय शिक्षण धोरणांत (एनईपी) शिक्षकांची भुमिका, गोंयांत कुशळटाय शिक्षण, शिक्षणीक क्षेत्राचो भूतकाळ आनी फुडार, शाळा आनी शिक्षकां खातीर तंत्रगिन्यान आनी डिजिटल शिक्षण, मुल्यांकनांत बदल, एनईपीतली मुळावी साक्षरता आनी संख्याशास्त्र अशा वेगवेगळ्या विशयांचेर उलोवप जातलें. शिक्षक, शिक्षणतज्ञ, राज्य एनईपी समितीच्या वांगड्यां खातीर हो परिसंवाद आसतलो.
ह्या परिसंवादाचें 5 डिसेंबराक राजभवनांत मुख्यमंत्री डॉ.प्रमोद सावंत हांचे हस्तुकीं उक्तावण जातलें अशें शेटगांवकार हांणी सांगलें.
उक्तावणा वेळार केंद्रीय शिक्षण सचीव आनंदराव पाटील, राज्य सचीव प्रसाद लोलयेकार, एनसीईआरटीचे संचालक प्रा. दिनेश सकलानी आनी निपाची उपाध्यक्ष शशिकला वंजारी हाजीर आसतलीं. चर्चासत्रांत रंजना अरोरा राष्ट्रीय अभ्यासक्रमाच्या आराखड्या विशीं मार्गदर्शन करतली. शशिकला वंजारी एनईपीच्या अंमलबजावणीत शिक्षकांची भुमिका, प्रा. रमेश बाहू ‘आयटप’ ह्या विशयाचेर मार्गदर्शन करतले.
परिसंवादाच्या दुसऱ्या दिसा अनिल सहस्रबुद्धे, वसुधा कामत (ऑनलायन), इंद्राणी भांडुरी, दीपक पालीवाल, अमरेंद्र बहेरा, विनय मेहेरोत्रा, डॉ. मधुश्री साउजी आनी डॉ. रामकृष्ण राव मार्गदर्शन करतले. समारोप सुवाळ्याक उदकास्रोत मंत्री सुभाष शिरोडकार हाजीर आसतले. हो परिसंवाद फकत निमंत्रितां खातीर आसलो तरी राज्यांतल्या सगळ्या शिक्षकांक ताचो लाव मेळचो म्हणून परिसंवाद लायव्ह प्रसारीत करतले अशें शेटगांवकार हांणी सांगलें.
अभ्यासक्रमांत थळावे घटक आसपावीत करतले
यत्ता पयली ते तिसरी आनी सवी वर्गा खातीर अभ्यासक्रम पुस्तकां एनसीईआरटी कडल्यान आयल्यात. हातूंत आमी थळाव्या घटकांचो आस्पाव करतले. एससीईआरटीच्यो वेगवेगळ्यो विशय समित्यो हाचे खातीर काम वावुरतात. अभ्यासक्रमांत गोंय संबंदीत उपक्रम आसचे हे खातीर आमी यत्न करतात अशें शेटगांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
