भांगरभूंय | प्रतिनिधी
पणजी: राज्य शिक्षणीक संशोधन आनी प्रशिक्षण पशिदे वतीन (एससीईआरटी) 5 आनी 6 डिसेंबर दिसा राष्ट्रीय पांवड्या वेल्या परिसंवादाचें आयोजन केलां. चर्चासत्रांत नव्या राज्य अभ्यासक्रम आराखड्या वतीन राज्यांतल्या शालेय शिक्षणांत बदल ह्या विशयाचेर तज्ञां वतीन मार्गदर्शन करतले अशी म्हायती एससीईआरटीच्यो संचालक मेघना शेटगांवकार हांणी दिली. सोमारा पर्वरे जाल्ले पत्रकार परिशदेंत त्यो उलयताल्यो. ह्या वेळार शिक्षण संचालक शैलेश झिंगडे, सरिता मराठे, गोविंदराज देसाय आनी रुपेश सावंत बी मानेस्त हाजीर आशिल्ले.
परिसंवादांत राष्ट्रीय शिक्षण धोरणांत (एनईपी) शिक्षकांची भुमिका, गोंयांतल्या कुशळ शिक्षण, शिक्षण मळाचो भूतकाळ आनी फुडार, शाळा आनी शिक्षकां खातीर तंत्रज्ञान आनी डिजीटल शिक्षण मुल्यांकनांतले बदल, एनईपीतली मुळावी साक्षरता आनी संख्याशास्त्र अशा विवीध विशयांचेर उलोवपां जातलीं. परिसंवाद हें शिक्षक, शिक्षणतज्ञ, राज्य एनईपी समितींतल्या वांगड्यां खातीर आसतलें. परिसंवादाचें उक्तावण 5 डिसेंबर दिसा राजभवनार मुख्यमंत्री डॉ. प्रमोद सावंत हांचे हस्तुकीं जातलें अशें शेटगांवकार हांणी सांगलें.
उक्तावण सत्राक केंद्रीय शिक्षण खात्याचे सचीव आनंदराव पाटील, राज्य सचीव प्रसाद लोलयेंकार, एनसीईआरटीचे संचालक प्रा. दिनेश सकलानी, निपाच्यो उपाध्यक्षा शशिकला वंजारी हेवूय हाजीर रावतले. चर्चासत्रांत रंजना अरोरा राष्ट्रीय अभ्यासक्रम आराखड्या विशीं मार्गदर्शन करतले. शशिकला वंजारी ह्यो एनईपीच्यो अंमलबजावणेंत शिक्षकांची भुमिका, प्रा. रमेश बाहू ‘आयटप’ ह्या विशयाचेर मार्गदर्शन करतले. सगल्या वक्त्यांक गोंय केंद्रस्थानार दवरून मार्गदर्शन करपाची विनंती केल्या.
परिसंवादाच्या दुसऱ्या दिसा अनील सहस्रबुद्धे, वसुधा कामत (ऑनलायन), इंद्राणी भांडूरी, दीपक पालीवाल, अमरेंद्र बहेरा, विनय मेहेरोत्रा, डॉ. मधूश्री साउजी आनी डॉ. रामकृष्ण राव हे मार्गदर्शन करतले. कार्यावळीच्या समारोप सुवाळ्यांत उदका स्रोत मंत्री सुभाष शिरोडकार हाजीर रावतले. परिसंवाद फक्त निमंत्रितां खातीर आसतलो, तरी राज्यांतल्या सगल्या शिक्षकांक हाचो लाव घेवंक मेळचो हे खातीर परिसंवादाचें लायव्ह स्ट्रिमींग करतले अशें शेटगांवकार हांणी सांगलें.
————–
बॉक्स
अभ्यासक्रमांत थळाव्या घटकांचो करतले आस्पाव
मेघना शेटगांवकार हांणी म्हणलें, एनसीईआरटी कडल्यान यत्ता पयली ते तिसरी आनी सवीच्या अभ्यासक्रमाचीं पुस्तकां आयल्यांत. हातूंत आमी थळाव्या घटकांचो आस्पाव करतात. हे खातीर एससीईआरटीच्या विवीध विशय समित्यांचें काम सुरू जालां. अभ्यासक्रमांक गोंय संबंदीत उपक्रम आसचे हे खातीर आमचे यत्न आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
