भांगरभूंय | प्रतिनिधी
राजकी आरक्षण, हेर हक्कांचे मागणे खातीर आंदोलन
मडगांव, प्रतिनिधी : मिशन पॉलिटिकल रिझर्व्हेशन फाॅर एसटी ऑफ गोवा हांचे वतीन राजकी आरक्षण तशेंच हेर हक्कां खातीर आंदोलनाक सुरवात केली. हक्कांच्या मागणे खातीर ५ फेब्रुवारीक विधानसभा भवनाचेर मोर्चा काडटले. आतां हे चळवळेक अखील भारतीय एकता परिशदेचें फाटबळ मेळ्ळां. एकता परिशदे कडल्यान राज्यपाल, राष्ट्रपतींक निवेदन सादर करून हो प्रस्न मांडटले अशें स्पश्ट केलें.
मडगांवां मिशन पॉलिटिकल रिझर्व्हेशन फाॅर एसटी ऑफ गोवा वतीन पत्रकार परिशद घेतली. ह्या वेळार मिशन पॉलिटिकलचे जुआंव फर्नांडीस, गोविंद शिरोडकार, जोसेफ वाझ, जॉयसी डायस हांचे वांगडा अखिल भारतीय आदिवासी एकता परिशदेचे राष्ट्रीय सचीव तशेंच संस्थापक वांगडी अशोक चौधरी, राजू पांढरा, जयदीप पाटील आनी हेर मानेस्त हाजीर आशिल्ले. जुआंव फर्नांडीस हांचे वतीन अशोक चौधरी हांकां फाटबळ दिवपा विशीं निवेदन सादर केलें.
अशोक चौधरी हांण, अखिल भारतीय आदिवासी एकता परिशद ही राष्ट्रीय पांवड्यार कार्यरत आसा. देखून आदिवासींचे प्रश्न सरकारकडेन तशेंच योग्य माचयेर मांडून ते सोडोवपाचो यत्न करतात. गोंयच्या एसटी भावांक अजूनही राजकीय हक्क आनी तांचे हेर हक्क मेळूंक ना. राज्य सरकार आनी एसटी भावां मदीं संवाद वाडोवन हो प्रस्न सोडोवपाचो यत्न करतले. गोंयचे राज्यपाल तशेंच देशाच्या राष्ट्रपतींक आदिवासी एकता परिशदे वरवीं निवेदन सादर करतले. आदिवासींचे हक्क तांकां मेळचे खातीर गरजेचे यत्न करपाची मागणी करतले. तशेंच केंद्र सरकारा कडेनूय उलोवन बेगीनूच राजकीय आरक्षणा वांगडा हेर आदिवासींचेय हक्क मेळोवपा खातीर यत्न करतले, अशें तांणी स्पश्ट केलें.
गोविंद शिरोडकार हांणी, फाटल्या विधानसभा अधिवेशनांत एसटीं खातीर राजकीय आरक्षणाचो मुद्दा चर्चेक आयलो. तेन्ना एसटी समाजांतल्या वांगड्या सयत सर्वपक्षीय शिष्टमंडळ केंद्राकडेन व्हरपाचें आस्वासन दिल्लें. स म्हयन्यां उपरांतूय हें आस्वासन सरकारान पुराय करूंक ना. एसटी समाजांत आपल्याक फटयिल्ल्याची भावना निर्माण जाल्या. हाचे पयलीं गांवां गांवांतल्यान सभा, बसका घेवन जागृताय केल्या. राजकी आरक्षण हो हक्क आशिल्ल्यान तो मेळपा खातीर एसटी भावांचो लढो सुरू आसा. राज्य सरकार कळाव काडिल्ल्यान ह्या हक्कांचे मागणे खातीर ५ फेब्रुवारीक विधानसभा भवनाचेर शांतिकायेन मोर्चा काडटले, अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
