भांगरभूंय | प्रतिनिधी
आयतारा बोर्डा – मडगांवां जातली विशेश आम सभा
मडगांव : गोंयच्या गवळी -धनगर समाजाच्या अनुसूचित जमाती (ST) प्रवर्गांतल्या आसपावाचो प्रस्न फाटल्या २३ वर्सां सावन आडकून आशिल्ल्यान ह्या सामक्या म्हत्वाच्या विशयाचेर चर्चा करपा खातीर गोवा धनगर समाजाची विशेश आम सभा आयतारा, ता. १४ जुनाक दनपरां २ वरांचेर बोर्डा – मडगांवच्या मल्टिपर्पज सभाघरांत आयोजीत केल्या.
गवळी -धनगर समाजाक अनूसुचीत जमातीचो दर्जो मेळचे खातीर फाटल्या कितल्याशाच वर्सां सावन सेगीत फाटपुरवण करतात. राज्य सरकार, केंद्र सरकार तशेंच संबंदीत मंत्रालयांकडेन शेगीत निवेदनां, मागण्यो आनी फाटपुरवण करूनय फाटपुरवण करूनय आयज मेरेन ह्या प्रस्नाचेर निमाणो निर्णय जावंक ना. हाका लागून समाजांत तिडक आनी अस्वस्थताय निर्माण जाल्या.
मजगतीं, गवळी – धनगर समाजाच्या अनुसूचीत जमाती आसपावाच्या प्रस्तावाक मान्यताय मेळूंक नाशिल्ल्याची विश्वासू म्हायती सामकार येता. हे विशींचें पत्र समाजकल्याण संचालनालयाक प्राप्त जाल्ल्याचेंय समजता. जरी ह्या पत्राची अधिकृत पुश्टी आजूनय जावंक ना तरी ह्या वृत्ताक लागून पुराय धनगर समाजांत तिडक, चिंता आनी अस्वस्थताय निर्माण जाल्या.
गवळी – धनगर समाजाचो अनुसूचीत जमाती प्रवर्गांतलो आसपाव हो इतिहासीक, समाजीक आनी सांस्कृतीक नदरेन अन्याय आशिल्ल्याचो समाजाचो ठाम दावो आसा. फाटलीं तेव्वीस वर्सां सुरू आशिल्ल्या ह्या लढ्याक न्याय मेळचो अशी समाजाची अपेक्षा आसा.
सध्याचे परिस्थितीचे फाटभूंयेर राज्यभरचे समाज भाव, बायलो, तरणाटीं, विवीध संघटनांचे पदाधिकारी आनी ज्येश्ठ नागरीक हे विशेश बसकेक हाजीर रातले. ह्या विशयाचेर सविस्तर चर्चा करून फुडली दिका आनी कृती आराखड्या विशीं निर्णय घेतले.
धनगर समाज आपल्या हक्कां खातीर एकवटान उबो आसा. न्याय मेळ मेरेन संघर्श सुरू दवरपाचो निर्धार समाजान केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
